Dette går fram av revidert nasjonalbudsjett, som vart lagt fram i dag.
Regjeringa legg også fram ein strategi for auka bruk av biodrivstoff. Regjeringa ynskjer at biodrivstoff skal utgjere to volumprosent io 2008 og fem prosent i 2009. Målet er sju volumprosent i 2010.
Regjeringa varslar ei omlegging av omregistreringsavgifta i statsbudsjettet for 2008.
Om regjeringa når målet om at fem prosent av drivstoffet som blir brukt i Noreg skal vere bioetanol i 2009, vil dette redusere CO2-utsleppa med 400.000 tonn.
Bruken av biodrivstoff skal i hovudsak skje ved at oljeselskapa skal blande inn drivstoffet i vanleg bensin og diesel.
Norges Automobilforbund (NAF) er ikkje nøgd med regjeringa sitt forslag. Administrerande direktør Jan Johansen i NAF seier at bilistane som vanleg får rekninga.
- Det er bra at regjeringa satsar på miljøvenleg drivstoff, men vi går ikkje med på at våre medlemer blir sitjande med rekninga. Å krevje at bilistane betalar for regjeringa si miljøsatsing samstundes som staten tener pengar på det, er direkte dobbeltmoral, seier Jan Johansen.
Han viser til at biodrivstoff kostar meir å produsere enn vanleg drivstoff, og meiner at kravet om innblanding av biodrivstoff vil gi ein auke i literprisen på mellom 10 og 20 øre.
NAF er nøgd med satsinga på kollektivtrafikk i storbyane og ekstraløyvina til sikring av tunnelane på E18 i Vestfold.