Det var trongt om plassen då Oddmund Løkensgard Hoel tok over statsrådskontoret i Kunnskapsdepartementet etter Sandra Borch tysdag.
Hoel har vore statssekretær sidan 2021, medan Borch tok over som minister i august, då Ola Borten Moe (Sp) måtte takke for seg.
– Eg er sikker på at du med din bakgrunn vil gjere ein utmerka jobb som minister. Du er rett mann på rett plass. Du er godt likt i sektoren og godt likt i departementet, sa Borch.
Etter utveksling av blomebukettar og nøkkelkort, forsvann Borch ut dørene utan å svare på spørsmål frå pressa. Ho går av etter at det fredag blei kjent at delar av masteroppgåva hennar er identisk med oppgåver som er levert av tidlegare elevar.
Garanterer at han ikkje har plagiert
Borch trekte seg fredag som minister etter at det blei avdekt at delar av masteroppgåva hennar var identisk med oppgåver som var levert inn av tidlegare studentar.
I tillegg er det også funne fleire tilfelle av tekstlikskapar i mastergradsoppgåva helse- og omsorgsminister Ingvild Kjerkol og ein medstudent leverte i 2021.
Støre seier dei har spurd Hoel om det er noko som heftar ved det akademiske arbeidet hans, men at dei ikkje har undersøkt arbeida sjølve.
– Eg meiner det må ligge til grunn at når ein er professor ved ein norsk utdanningsinstitusjon, og har fått godkjent arbeida sine der, må vi kunne stole på at dei held mål, seier Støre til NRK.
Til NRK seier Hoel at han er sikker på at han ikkje har plagiert i dei akademiske tekstane han har skrive.
– Ja, det er eg rimeleg sikker på.
– Korleis kan du vere så sikker på det?
– På grunn av det arbeidet eg har gjort som forskar. Eg har passa på å referere og sitere ordentleg, og følge dei akademiske reglane som er for slike ting.
Professor i historie
Oddmund Løkensgard Hoel har doktorgrad i historie frå NTNU i 2009, og var professor ved Høgskulen på Vestlandet då hann blei statssekretær i 2021.
Han har også vore kommunestyrerepresentant for Senterpartiet i Luster kommune.
Då Støre presenterte Hoel som ny minister, la han vekt på at dette er ein person som kjenner departementet godt.
I tillegg rekte han fram den akademiske bakgrunnen som ein fordel.
– Han er godt likt blant dei han skal styre. Det er godt. Men det held å bli respektert, for det kjem nokre tøffe avgjersler, sa Støre, som også gler seg til å få ein professor i historie rundt regjeringsbordet.
Hoel får med seg Ivar Prestbakmo som statssekretær i departementet. Prestbakmo var vararepresentant for Sandra Borch på Stortinget, men går han altså inn i regjeringa når Borch tek plass på Stortinget igjen.
Mange utskiftingar
Av dei 18 statsrådane som følgde statsminister Jonas Gahr Støre (Ap) ut på Slottsplassen etter regjeringsskiftet i 2021, er ni no ute. Halve regjeringa er med det skifta ut på to år.
Støre seier dei mange skifta har vore strevsame, og at dette er ting som kan kome i vegen for politikken regjeringa skal gjennomføre.
– Vi har store oppgåver å gjennomføre. Vi skal føre ein politikk som tek Noreg gjennom ei krisetid.
Han viser til at mange av sakene som har ført til skifte i regjeringa har eit opphav i ting som har skjedd i tida før ministrane kom i regjering.
– Eg skulle gjerne ha vore alle desse sakene forutan. Men eg tek mitt ansvar ved at når ei sak oppstår, tek vi tak i ho med ein gong, gå inn i ho, og trekke dei konklusjonane som er naudsynte.
Støre seier han håper det ikkje er fleire slike saker no, men at han ikkje kan garantere at det ikkje skjer.
Håper Hoel skal skape ro
Nestleiar og utdanningspolitisk talsperson i Venstre, Abid Raja, ønsker den nye ministeren lykke til i sin nye jobb, og seier han håper Hoel kan skape ro i sektoren.
– Eg håper Hoel blir ein minister som spelar på lag med sektoren, som er oppteken av dialog for å finne gode løysingar, og som rett og slett stiller opp for den sektoren han har ansvaret for.
MDG-leiar Arild Hermstad synest det er positivt at vi no har fått ein statsråd med bakgrunn frå akademia. Han håper dette skal gi eit løft for studentane.
– Studentane er framtida vår. Difor må Hoel jobbe for å få auka studiestøtta, bygge fleire studentbustader og nye tiltak for å betre den psykiske helsa til studentane.
Utdanningspolitisk talsperson i SV, Grete Wold, ser fram til å samarbeide med Hoel, og legg også vekt på studentøkonomi som ei viktig sak.
– SV har kjempa gjennom ein naudsynt auke i studiestøtta to gongar i budsjettforhandlingar med regjeringa. Eg håper Hoel held fram å prioritere studentane inn i budsjetta.