– Eg dreg litt på det eine beinet ennå, eg går og subbar litt. Men det er vel berre ei treningssak, seier Jens Dahl.
78-åringen fekk hjerneslag for berre få månader sidan, men er allereie tilbake i jobb.
Han har opplevd fleire slag og turar til Rikshospitalet, men så fekk han ein operasjon som er ny for pasientar med større hjerneslag.
Utan den nye behandlingsmetoden hadde han kanskje ikkje overlevd, eller han kunne vorte pleiepasient.
– Det var godt å verta ferdig med det.
Reddar liv
Hjerneslag er ei av dei vanlegaste dødsårsakene i Noreg. Over 9000 menneske får hjerneslag kvart år.
Men behandlingsmetoden «blodproppfisking» aukar sjansen med å overleva større hjerneslag med 11 prosent.
Det viser ein ny global studie kor også Oslo Universitetssjukehus er med.
Eit plastrøyr vert ført gjennom blodåresystemet, heilt opp til hjernen. Anten vert blodproppen soge ut eller så vert han huka tak ved hjelp av eit lite verktøy og trekt ut.
Tidlegare har blodproppfisking berre vorte gjort hjå pasientar med mindre hjerneslag.
På radiologisk avdeling ved Rikshospitalet gjer dei 250 slike operasjonar i året, men resultata frå studien kjem nok til å føra til fleire.
Minskar skadane
Behandlinga som Dahl fekk aukar også sjansen for å vinna att brukbar funksjon med 18 prosent.
– Det tydar at sjølv dei som har større, etablerte skader kan få effektiv behandling og koma seg etter slaget, seier lege og nevrolog Anne Hege Aamodt.
Ho er legen til Dahl og er begeistra for resultata.
– Viss han ikkje hadde fått operert ut blodproppen, hadde han fått påverking på språket og stor lamming i høgre side og påverking på språket. Då hadde det ikkje vore mogleg å køyra bil eller jobba i bedrifta som han gjer nå.
– Eg har ikkje fått nokre varige men, seier Dahl.
Sjølv om han vart pensjonert for omtrent ti år sidan, har han ingen planar om å slutta å jobba på verkstaden til sonen.
– Opp og ut, og ta tilbake livet, det er heilt avgjerande for å funka. Jens skal ha æra for at det vart så bra, seier Aamodt.