Si kva du meiner nederst i artikkelen.
Det er eit vakkert land, med det er dyrt - og naturen er kjedeleg. Noreg som turistmål er berre middelmådig, ifølgje ein rapport som HSH la fram denne veka.
Les:
Rapporten er laga av inFuture og ECON.
Men dette stemmer ikkje, meiner Innovasjon Norge. Det er dei som har ansvar for å marknadsføre Noreg i utlandet.
Innovasjon Norge sine undersøkingar viser noko anna, fortel reiselivsdirektør Per-Arne Tuftin.
Turistane er nøgde
- Det er ikkje grunnlag for å karakterisere Noreg som eit kjedeleg reisemål, og at naturen ikkje held mål, seier Tuftin. Vi veit at rundt 98 prosent av alle som kjem til Noreg, kjem hit for å oppleve naturen.
- Vi veit også at når dei forlet landet, er dei også svært godt nøgd med dei naturopplevingane som dei har hatt, seier han.
Han meiner deler av HSH-undersøkinga er gjennomført på ein slik måte at den ikkje gjev eit korrekt bilete.
Fleire opplevingar
- Men er det ingen ting å lære av denne rapporten?
- Jau, det er heilt klart behov for eit betre tilbod når det gjeld opplevingar for turistane, seier Tuftin.
- Dette har vi jobba med ei god stund, og det kjem vi til å jobbe mykje mer i tida som kjem. Opplevingane må tilretteleggjast betre. Mellom anna treng vi å trekkje inn kultur- og matopplevingar, og element frå norsk historie i større grad enn vi gjer no.
Sjølvgode
Reiselivsforskar Arvid Flagestad på BI meiner vi er blitt litt sjølvgode fordi vi har fin natur.
- Dette lammar oss når vi skal utvikle ei reiselivsnæring som meir og meir er prega av at vi skal ha spennande opplevingar for turistane, seier han.
- Kva må til?
- Vi må bruke naturen som den spannande kulissen den er. Gudbrandsdalen er spennande i seg sjølv, men når vi får Peer Gynt-spelet i Gudbrandsdalen er det også mykje meir spennande å vere i Gudbrandsdalen, seier Flagestad.
- Det er også i opplevingsturismen at pengane ligg, legg han til.
