– Eg gleder meg til å gå ut å kunne trille tur med Ingrid utan å måtte pakke ho inn i mykje ullklede og meg i boblejakke.
Det seier Kamilla Rafaelsen. I desember bestilte ho og sambuaren reise til Alicante i Spania.
Då var det mørkt og kaldt i Kabelvåg i Lofoten, og familien på tre trengde sol og varme.
Det smakar også ekstra godt etter dei tre stormane i Nordland sist veke.
– Vi gleder oss veldig til høgare temperaturar og mindre påkledning.
Dei er ikkje aleine om å bestille reiser til varmare strøk om vinteren.
Ifølge fleire reiselivsselskap er det no mange nordmenn som vil reise til varmare strøk.
Opptil 30 prosent fleire har bestilt sydenferie i vinter, samanlikna med tal frå i fjor.
– No orkar vi ikkje meir kulde, og då tar vi gjerne den kortaste vegen til sola som på vinteren er Gran Canaria, seier kommunikasjonssjef i Tui, Anne-Mørk Løwengreen.
– Vêrforholda har direkte innverknad
Vêret slår også inn på bestillingstala til Ving og Apollo.
– Det er openbert at vêrforholda har ein direkte innverknad på bestillingstala, seier landssjef i Ving, Marie-Anne Zachrisson i ei pressemelding.
Ifølge ho har dei ein auke i talet på nordmenn som har bestilt ei reise i vinterferien dei siste vekene.
I den nest siste veka i januar opplevde Ving ei auke på 33 prosent i vinterbestillingar, samanlikna med same veke i fjor.
– Totalt ligg salet av vinterreiser generelt no 30 prosent over fjoråret, seier kommunikasjonssjef i Apollo, Beatriz Rivera.
Finn reise har også ei auke på pakkereiser i vinterferien. Ifølge kommersiell direktør Terje Berge så har dei ei auke på 24,2 prosent frå i fjor.
Hos flyselskapet Norwegian er det også stor pågang, seier Eline Hyggen Skari som er senior kommunikasjonsrådgivar.
– Vi opplever at det er overraskande høg reiselyst, til landa rundt Middelhavet spesielt.
Norwegian gir ikkje ut konkrete tal rundt sala på grunn av konkurransemessige årsaker, seier Skari.
Utselde charterreiser
I vinterferievekene er 97 prosent av alle charterreisene til Ving utselt, skriv dei i pressemeldinga. Ifølge Apollo og Tui har dei også så godt som selt ut sine pakkereiser i ferien.
Selskapa opplever særleg stor interesse for avgangane til Kanariøyane i vinterferievekene.
– Det er ikkje tvil om at reiselysta er på topp blant nordmenn som rømmer landet for å oppleve sol og varme på Kanariøyane i vinterferien, seier Løwengreen i Tui.
Ho seier at vinteren har vore over snittet kald for mange, noko som har ein direkte effekt på reiselysta.
– Det er heilt klart sol og bad som er det største trekkplasteret i vinterferien.
Påska utmerker seg
Hos reiseselskapet Apollo er det påska som utmerker seg ekstra.
– For påskeferien ligg no salet 40 prosent mot same tid i fjor. Det er med andre ord ingen tvil om at den kalde starten på året verkeleg har sett i gang nordmennene si reiselyst, seier kommunikasjonssjefen.
Ifølge ho er grunnen ein blanding av dei raude dagane som kjem midt i veka, men også vêret og at reisene i vinterferien vart utselt så fort.
– Men eg trur også ein grunn kan vere at mange valde å feriere i Noreg i fjor, seier Rivera.
Virke: Folk skal bruke meir pengar
Bransjeorganisasjonen Virke har gjennomført ei landsomfattande undersøking som ser på nordmenn sine ferieplanar i år.
Tala, som vart klare i januar, viser at nordmenn prioriterer ferie, sjølv om alt i samfunnet har blitt dyrare.
– I år planlegg nordmenn å bruke 45.900 kroner på ferie. Det er ein auke på nesten 10.000 kroner i forhold til i fjor som hadde eit rekordlågt planlagt forbruk på 36.250 kroner, seier bransjedirektør reiseliv i Virke, Audun Pettersen.
I undersøkinga kjem det fram at nesten fire av ti nordmenn seier at planane kan bli påverka av prisnivået og valutasituasjonen.
– Trass i dette meiner nesten halvparten av oss at det er viktig å prioritere ferie, sjølv om det er dyrare enn tidlegare. Ferie er viktig for oss og det er kanskje noko av det siste du kuttar når disponibel inntekt i hushaldningane blir mindre, seier Pettersen.