Etter 200 søknader fekk Dayo seg endeleg jobb: – Eit mirakel

NRK har tidlegare fortalt historia til Dayo i Bodø.

Eigentleg heiter han Adedayo Adebiyi. Men alle kallar han berre for Dayo.

Han måtte ut av landet om han ikkje fekk seg jobb som var relevant til økonomiutdanninga.

Det såg mørkt ut for Dayo, for han hadde berre tre veker på seg.

Men i siste augeblikk løyste det seg.

Då stormen «Ingunn» raste i Nordland såg Dayo berre solskin.

Først endra UDI meinig og gav han utvida studentvisum likevel. Det hadde dei først gitt avslag på.

Dagen etter fekk Dayo vite at han hadde fått fast jobb som revisor i KPMG i Bodø.

– Det er eit mirakel. Eg er så lykkeleg.

Advokat Trygve Tveter meiner det var ein stor fordel for Dayo kva studium han hadde valt. Han seier at mange ikkje er klar over kor vanskeleg det er å få bli i Noreg.

• Det var ikkje alle som var like heldige som Dayo i stormen. Martin og familien måtte flykte frå flygande gjenstandar.

Søkte på 200 jobbar

Dayo søkte nesten 200 jobbar i månaden mellom avslaget frå UDI, som snudde nesten samstundes som han fekk jobb.

– Eg var så stressa. Eg sov ikkje. Eg leita etter jobb heile tida, og la meg tidlegast klokka to på natta. Eg var så lei meg, fordi eg var sikker på at eg ikkje kunne gi tilbake til Bodø.

Til slutt måtte han berre håpe at alt skulle endre seg. Då han anka vedtaket til UDI var han sikker på at svaret kom til å bli negativt igjen.

– Då eg fekk vite at eg hadde fått utvida studentvisum blei eg så glad.

I Noreg er reglene slik at når du er ferdig med utdanninga kan du få eit år på å leite etter jobb.

Men det treng ikkje Dayo. No kan han søke direkte på arbeidsvisum.

– Eg har allereie fått draumejobben. Eg er så takknemleg og glad.

Må tenke gjennom val av studium

Det er ikkje alle utanlandske studentar som er like heldige som Dayo.

Advokat Trygve Tveter har jobba lenge med utlendingsrett, og seier det er vanskeleg for utanlandske studentar å få jobb i Noreg.

– Mi erfaring er at utanlandske borgarar frå Asia og Afrika har store problem med å få jobbtilbod, seier Tveter og legg til:

– Om eit arbeidstilbod er avgjerande for opphaldsløyve som faglært, så er mitt råd at ein ikkje skal vere for fin på det.

Tveter ser at mange av klientane hans kan vere naive i val av studium når det kjem til sjanse for jobb og opphaldsløyve.

Spesielt om dei vel det han kalla for «mjuke fag», som til dømes teologi.

– Det er ikkje lett å få arbeidstillating i sånne faggrupper for utlendingar, er mi erfaring. Det er lettare å få arbeidstilbod om ein kan engelsk og norsk, og har utdanning som til dømes sjukepleiar eller dataingeniør.

Vil hjelpe andre

– Vi vurderte han på akkurat dei same kriteria som vi hadde til dei andre søkarane.

Det seier Kirsti Meidelsen. Ho er leiar for revisjonsverksemda til bedrifta KPMG i Bodø.

Meidelsen fortel at ho hadde sett videoane som Dayo la ut på sosiale medium og den tidlegare saka til NRK.

Men Dayo fekk ikkje jobben av den grunn. Han måtte gjennom ein like tøff søknadsrunde som resten av søkarane.

– Han har veldig mange av dei eigenskapane vi er ute etter og representerer verdiane til KPMG på ein god måte, seier Meidelsen.

Seniorrevisor Adrian Hansen, var ein av dei som intervjua Dayo til jobben.

– Han spelte med opne kort og fortalde at han var i ein utfordrande situasjon, men på same tid var ikkje det hovudpoenget i intervjuet. Han klarte å få fram den personen han er.

Dayo seier han no vidare vil hjelpe andre utanlandske studentar til å få jobb.

– Eg vil bruke erfaringa mi til å lære andre. Kanskje dei kan lære av det eg var igjennom. For det er viktig at ein startar med å finne jobbar som passar ein når ein kjem til Noreg, avsluttar Dayo.