Noregs Fiskarlag om DAB-dekninga: – Dei gamblar med tryggleiken

– Utan radio er ein heilt hjelpelaus, seier Steinar Jonassen, dagleg leiar av Nordland Fylkes Fiskarlag.

Onsdag 11. januar sluttar NRK å sende radio på det gamle FM-nettet i Nordland. Alle sendingar frå rikskringkastinga, mellom anna nyhender og vêrvarsling, kjem til å bli sendt på digitalradio.

– Dei tilbakemeldingane me har fått frå fiskarane er at der er store hól langs nordlandskysten, så difor er me svært spent på kva som skjer når vêrvarslinga til NRK ikkje lenger kjem på FM-nettet, seier Jonassen.

– Ein treng ikkje uroe seg

– Havet har svært god dekning no, seier Jørn Jensen hjå hjelpeteamet til Digitalradio Norge.

Jensen understrekar at NRK har testa dekninga fleire stadar langs kysten mellom Andenes og Rørvik. Denne rapporten undersøkte også kva slags radioar som fungerte kvar, og konstaterte at innanfor dekningskartet hadde integrerte radioar med høg antenne godt signal, medan lågare antenner og bordradioar måtte mykje nærare sendarane.

• Les også: Alt du trenger å vite om radioovergangen

– Men så klart, me ser på rapportar som kjem inn, og er der alvorlege manglar, gjer me det me kan for å få opp sendarar eller andre løysingar, legg Jensen til.

Nye sendarar

Men utbetringar av dekninga skjer i siste liten. Tidlegare denne veka blei det installert ei DAB-antenne på Skomvær Fyr, som skal dekkje havområde rundt Røst, som har hatt rapporterte problem. Ei slik antenne blei også nyleg sett opp på Værøy.

– Me tykkjer det er særs viktig at fiskeflåten får den dekninga dei nye sendarane gjev dei, seier Jensen.

• Les også: Bedre DAB for kystfiskeflåten i Nordland

Men ikkje alle er like nøgd med utbygginga av nye sendarar så nært på datoen radioen bytar plattform.

– Dei gamblar med tryggleiken, slik dei held på no, seier Kjell Ingebrigtsen, leiar av Noregs Fiskarlag.

– Korleis kan dei påstå at dekninga er god nok, utan å ha testa desse nye sendarane? legg Ingebrigtsen til.

Noregs Fiskarlag jobba lenge for å utsetje NRK si flytting over til digitalradionettet, av same grunnar som dei no er bekymra for, men overgangen skjer no uansett. Det stoggar ikkje Ingebrigtsen frå å ytre si meining.

– At me kjem til å hamne i situasjonar, det er eg rimeleg viss på.

Sjekk dekningskartet der du ferdast

Digitalradio Norge har eit interaktivt dekningskart på deira nettstad. Her kan du også finne svar på diverse om digitalradio.

• Les også: NRK sin dekningsrapport