Like før klokka 12 fredag melde politiet i Møre og Romsdal at ein person var frakta i båt til Kristiansund etter ei dykkerulykke.
Per Åge Ferstad, operasjonsleiar i Møre og Romsdal politidistrikt, fortel at dei blei varsla om ulykka av ein anna person som heldt på med dykking i området. Han var ein del av ei gruppe.
– Meldinga gjekk ut på at ein av personane i dykkargruppa var bevisstlaus. Han blei funnen livlaus i vassoverflata, fortel Ferstad.
Mannen som omkom i ulykka var ein finsk statsborgar i 60-åra. Like før klokka 22 skriv politiet at dei pårørande er varsla.
Starta med hjarte- og lungeredning
Etter ulykka fekk dei andre i gruppa personen opp i båten og starta umiddelbart med hjarte- og lungeredning, fortel Ferstad i politiet. Dei køyrde så i retning Kristiansund, der dei fekk personen i land.
– Der tok ambulansepersonell over det livreddande arbeidet, sa Ferstad til NRK i 12.00-tida.
Både ambulansen og luftambulansen stod klar på staden då dykkarane kom til land.
Dei involverte er utanlandske borgarar.
Det er så langt uklart kva som var årsaka til ulykka.
– Vi veit førebels svært lite. Resten av gruppa blei tatt med inn til politistasjonen for å gi ei forklaring. Så får vi meir informasjon om kva som har skjedd, seier Pål Strømsholm Greger, innsatsleiar i politiet.