Dei tilsette i Helse Nordmøre og Romsdal er usikre på kva helseministeren sitt påbod om samanslåing av helseføretaka i fylket vil tyde.
– Det er skapt utryggleik på kva som skjer no. Vi har sett nokre ord i media, men dette var ikkje drøfta i ein demokratisk prosess før det vart bestemt, seier Egset som er tillitsvald for dei tilsette i Fagforbundet.
– Vi må behalde roa
Konstituert styreleiar i Helse Nordmøre og Romsdal, John Harry Kvalshaug, sa på dagens styremøte at han ser klart kva oppgåva til styret er.
– Det har vore mykje kjensler i spel dei siste dagane, men no må vi i styret behalde roa og gjere nyttige vedtak slik at pasientar, tilsette og omverda blir sikre på at pasientbehandling og behandling av dei tilsette blir trygg og god, seier styreleiaren.
– Skal følgje styret godt
Kvalshaug seier styret ikkje skal bruke meir tid og energi på påbodet om at dei to helseføretaka i fylket blir eitt. Det vart stadfesta i går, og det var det, seier den konstituerte styreleiaren.
- Styret har no vore klar på at alt skal skje med tryggleik for den einskilde tilsette, og vi kjem til å følgje godt med for at det skal skje, seier tillitsvald Knut Ivar Egset.