«Vi ber statsråden om å godkjenne konseptplanane for nytt Molde sjukehus på Eikrem snarast mogleg», skriv leiar i Molde SV, Inger Mette Hogstad, i eit opent brev til Helseministeren.
Partiet er sterkt ueinige i statsrådens avgjersle om å utsette bygginga av det nye sjukehuset på Eikrem i Molde, frå 2012 til 2018.
Hogstad seier ho fekk bekrefta av Bård Vegard Solhjell, nestleiar i Sosialistisk Venstreparti, at partiet sentralt har same synspunkt som Molde SV.
– Han ringte meg i dag for å klargjere SV sitt standpunkt. Partiet ynskjer at Molde nye sjukehus på Eikrem skal byggast snarast mogleg, seier Hogstad.
Nestleiar i SV, Bård Vegar Solhjell, kjem til Molde i januar. Då vil han vitje Molde sjukehus.
Foto: Håkon Mosvold Larsen / Scanpix
Handla utan støtte
Det er Molde SV si oppfatning at Strøm-Erichsen har fastsett ein politikk på eigen i hand, utan at koalisjonspartia har vore med på avgjersla.
– Geir Ketil Hansen sit i Helsekomiteen frå SV. Han var ikkje med i nokon prosess og fekk berre ei orientering kort tid før avgjersla. Stortingsgruppa har ikkje vore med i rådslaging, seier Hogstad.
Solhjell skal ha sagt at han ikkje kjenner til nokon skjult agenda bak utsettinga av byggestart på Nye Molde sjukehus. Hans oppfatning skal vere at det blir to sjukehus på Nordmøre og Romsdal. Den oppfatninga har ikkje Hogstad.
Trur på agenda-skuldingar
– Dersom ein les brevet frå statsråden, syns eg det er vanskeleg å ikkje tolke det slik at ho vil ha berre eitt sjukehus på Nordmøre og Romsdal, seier Hogstad.
– Eg var til stades og høyrde på då Helseministeren var i Molde tysdag. Eg fekk kjensla av at ho tenkjer å ha eitt felles sjukehus. Det at ho snakka om kva som er best på lang sikt og spurde «skal vi fastsette tomta allereie no?», fekk meg til å stille spørsmål ved det.
Dersom Molde ikkje får eit eige sjukehus, ser Molde SV på det som eit brot på den andre Soria Moria-erklæringa, Ukapittel 9 «ingen lokalsjukehus skal leggast ned».
– Oppussing er bortkasta
Strøm-Erichsen vil pusse opp Molde sjukehus for ein halv milliard kroner. Det kan i verste tilfelle føre til at det nye sjukehuset aldri vil bli bygd, seier Hogstad.
– Det er klart at jo meir pengar som brukast på andre ting, jo mindre blir det att til nytt sjukehus. Vi ser på det som bortkasta pengar, som vil utsette byggestart enda meir
