Det blei sett ny rekord for innleverte bilar til vraking i Noreg i år. 20. mars var datoen for å betale årsavgifta på bilen. Dagen før var det mange som rulla bilen inn til siste stanse.
– Det ser ut til at vi passerte over 5000 bilar 19. mars i år, seier avdelingsleiar Eirik Sannes i tollregion Midt-Noreg.
I Ålesund måtte Vartdal gjenvinning leige ekstra område for å få plass til alle som blei levert i førre månad.
– I år har vi tatt inn om lag 700 bilar berre dei siste fjorten dagane før den 20. mars, seier marknadssjef Gunnar Olsen ved Vartdal gjenvinning AS.
Auka med 1000-lappen
Vrakpantsatsen har sidan 2011 auka med 1000 kroner. I dag får du 2500 kroner i vrakpant per køyretøy. Likevel trur ikkje Olsen at det berre er den ekstra tusenlappen som gjer at folk vel å vrake bilen.
– Det er nok verkstadprisane som er så dyre at folk kan ikkje sette ein gamal bil på verkstad for å betale 10.000 kroner, seier Olsen.
Mange bilar som kjem inn til gjenvinning er særs gamle, og ikkje noko særleg å ha på vegane.
– Når bilane er blitt gamal og brukt opp er det berre å hive den, sånn er det i dag, og det er jo bra, seier Olsen.
Frå bil til hårfønar
Bilane blir malt opp og sortert og går til gjenvinning og blir nye produkt.
– Bilane kan bli til både syklar, nye bilar, hårtørkarar og så vidare. Alt saman blir brukt opp igjen, avsluttar Olsen.