Til Tidens Krav opplyser Alf Rune Rolland på politistasjonen i Kristiansund at Politiets Sikkerhetstjeneste (PST) har blitt kopla inn i saka.
– Både gjerdet og hengelåsen var klipt opp. Det kan tyde på at tjuvane visste kva som var i containeren, seier han til avisa.
Politiundersøking
Politiet fekk melding om innbrotet litt over klokka 13 tysdag. Politiinspektør Ove Brudevoll seier til NRK at politiet førebels ikkje har nokon mistenkte i saka, men at dei har folk på staden for å sikre spor.
– Førebels er det berre snakk om ei vanleg politiundersøking, seier han.
– Kvifor har PST blitt kopla inn?
– Det er ei rutinesak. Inntil vidare har dei berre fått melding om kva som har skjedd, så får vi ta det derfrå når vi har fått henta inn meir informasjon.
– Gjødsla er ufarleg
Til NRK seier administrerande direktør i Felleskjøpet, Randi Dyrnes, at det ikkje er fare for at gjødsla kan bli brukt til sprengstoff.
– Nitrogeninnhaldet i dei stolne sekkane skal vere på 16,3 prosent, noko som svarar til nivået til vanleg hagegjødsel, seier ho. – Det skal dermed ikkje vere fare for at gjødsla kan brukast til noko farleg.
Dyrnes seier at ho ikkje veit kvifor PST har blitt kopla inn.
– Likevel er det jo ikkje hyggeleg når til dømes bensin, som er farleg i seg sjølv, vert stelt frå oss, seier ho.
Politiet har ingen mistenkte, og ber om tips i saka.