– Det er bra å få inn ein utan bindingar i sjukehusstriden

Det har vore ein heit debatt dei siste to åra om det skal vere eitt eller to sjukehus på Nordmøre og i Romsdal.

Molde vart lovt nytt sjukehus, men i desember 2010 utsette helseminister Anne-Grete Strøm-Erichsen bygginga. Kristiansund på si side frykta at akuttfunksjonen ville forsvinne frå sitt sjukehus og kravde eit felles sjukehus midt mellom byane.

Sterke kjensler

Då striden var på sitt mest betente i 2011, håpte dei at Jonas Gahr Støre som kom på besøk, ville mekle og finne ei løysing. Det gjorde han ikkje.

Ordførar i Molde, Torgeir Dahl, er ikkje overraska over statsrådsskiftet i Helsedepartementet kjem no. At Støre vert ny helseminister ser han som positivt.

– Dette har vore ei vanskeleg sak både for oss og for departementet. Det er knytt mange kjensler til Anne-Grete Strøm-Erichsen og hennar statssekretær Robin Kåss, seier Dahl. Han synest det er greitt å få inn Støre som ikkje har same bindingane i saka.

Korrekt og nøyaktig

Ordføraren karakteriserer Støre som yttarst korrekt og pinleg nøyaktig i sitt arbeid. Han trur den nye helseministeren vil legge faglege vurderingar til grunn, når den endelege avgjerda for sjukehusstrukturen vert tatt.

Smart med skifte

Også ordføraren i Kristiansund, Per Kristian Øyen stiller seg positiv til statsrådsskiftet.

– Eg trur det er smart at vi får ein ny helseminister no. Kva det vil bety for sjukehusa på Nordmøre og Romsdal og utfordringane vi har, får vi sjå etter kvart, seier Øyen.

Helse Møre og Romdal er no inne i ein prosess der dei vurderer sju ulike alternativ for organisering av sjukehusa i fylket.