Politiet avsluttar søk etter den sakna spanske kvinna

På grunn av dårleg vêr avrunda politiet fort søk med helikopter rundt Høgaksla/Mjølvafjellet etter den sakna kvinna torsdag.

– Det er ikkje teikn til betring i morgon, så vi vurderer at vi ikkje skal fortsette søket no, Anders Skorpen-Trøen i Møre og Romsdal politidistrikt.

Mykje snø på fjellet er òg med på å gjere leitearbeidet vanskeleg. Skorpen-Tøren fortel at dei skal vurdere om dei skal fortsette søket seinare i år eller neste år.

– Dersom det ikkje blir ein periode med mildvêr, søkjer vi ikkje meir i år, seier han.

Politiet har ein del bilde frå både helikopter og drone. Skorpen-Tøren fortel at dei no skal analysere bilda, og at dersom dei finn noko, kan nytt søk bli aktuelt.

Funne ein sekk

Politiet leita onsdag med hund, drone og mannskap i området Nesaksla – Romsdalseggen.

Torsdag morgon bekreftar politiinspektør Anders Skorpen-Trøen at dei har fått meldingar frå fleire som har observert kvinna på Nesaksla den aktuelle datoen.

– På bakgrunn av dei opplysningane har vi for det fyrste fått bekrefta at kvinna var på Romsdalseggen, og for det andre fått eit avgrensa søksområde.

Politiet fekk i går overlevert ein sekk som vart funne på fjellet i sommar.

– Den har innhald som taler for at ein spansk person har eid sekken, seier han.

Dei fortsette søket på same måte som onsdag, med drone, hund og mannskap.

– Vi har ingen grunn til å tru at det har skjedd noko anna enn ei ulykke, seier Skorpen-Trøen.

Åndalsnes avis omtalte først dei nye opplysningane om søksområde og helikopter.

Blei kontakta i juli

Spanske styresmakter kontakta politiet i slutten av juli om den sakna kvinna.

– Vi har gjort ein del undersøkingar, både vi og spansk politi, for å finne spor på kor ho hadde vore. Den siste sikre plassen vi veit ho har vore er på eit hotell i Åndalsnes, og så er det opplysningar som tydar på at ho hadde planar om å gå Romsdalseggen, sa Skorpen-Trøen onsdag.

Det er først i det siste at dei fekk opplysningar om at ho hadde planar om å gå den populære turen over Romsdalseggen, fortel politiinspektøren.

No gjer politiet undersøkingar for å finne ut om ho har gått fjellturen, og om ho har vore utsett for ei ulukke.

Høyrer med publikum

Ifølge opplysningane til politiet skal kvinna ha vore aleine på noregsferie.

– Vi går ut for å undersøke med publikum om nokon kan ha sett ho, og som kan bekrefte eller avkrefte om ho har gått turen – og som kan hjelpe oss å vite kor vi skal leite, seier Skorpen-Trøen.

Kvinna er 75 år, truleg kledd med skaut på hovudet og med vandrestav, opplyser politiet.