Opphevar kokevarsel for dei fleste i Ålesund

Det melder Ålesund kommune.

Kommunen forklarer at vassprøve nummer to er analysert og viser at det er trygt å drikke vatnet for dei fleste av dei 18.000 som fekk kokevarsel onsdag.

Kommunen melder at vassforsyninga no er i normal drift, og at det ikkje lenger er nødvendig å koke drikkevatnet dei fleste plassar.

Unntak

Unntaket er Bjønnadalen, Grensegata, Fjellstua og øvre del av Vervgata.

Kommunen opplyser i ein artikkel på sine nettsider at dei der har hatt lågt trykk og til dels vore utan vatn.

– Dette gir risiko for forureining og det er heller ikkje faste prøvetakingspunkt her som fortel om kvaliteten på vatnet. Innbyggarane i dette området får no vatn direkte frå høgdebassenget. I samband med denne hendinga skal det gjerast ytterlegare arbeid med reinsing av bassenget, skriv kommunen.

Dei opplyser at vatn frå bassenget er skilt med dobbel barriere frå resten av byen.

– På grunn av vidare arbeid med vassforsyningssystemet og bassenget vert kokevarselet som føre-var-prinsipp opprettheldt i dette området, sjølv om vi no har to reine oppfølgingsprøver også frå bassenget, skriv dei.

Innbyggarane det gjeld får varsling om det på SMS om utviklinga framover.

Kan bli sjuke

Dersom ein får i seg denne typen tarmbakteriar kan det føre til symptom som magetrøbbel, kvalme, diare og oppkast, ifølge kommuneoverlegen i Ålesund, Alexander Wiig.

– Dersom ein skulle ha det, og det blir meir enn berre eit mildt forløp, så er det viktig å kontakte fastlegen for å ta prøver, sa han til NRK.