Sanco Shipping blei grunnlagt i 1996, og byrja verksemda med eit fiskerifarty som blei bygd om til seismikk-skip. I dag består flåten av fem skip. Kontrakten som blei inngått i dag er ein del av ein plan om å auke flåten til 7 farty.
Sanco Shipping inngjekk i dag kontrakt med Kleven Maritime om eit nytt seismikkfarty, med opsjon på eitt farty til. Administrerande direktør Ivar Slettevoll i Sanco er oppteken av den korte avstanden mellom verftet og reiarlaget.
– For oss er kvalitet og tryggleik for rett levering heilt sentralt. Det er flott når vi kan finne det hos leverandørar i vår eigen kommune, seier Slettevoll.
Skipet skal leverast i mai 2013, og er designa av Skipsteknisk AS i Ålesund. For Kleven blir dette bygg nummer 355.
– Det er gledeleg for Kleven Maritime og myklebust verft at Sanco Shipping vel å kontrahere lokalt. Dette er med på å understreke styrken i den lokale maritime klyngen, seier konsernsjef Ståle Rasmussen i Kleven Maritime.
Kleven Maritime har sidan starten av mai skrive 3 nybyggingskontraktar til ein verdi av 1,2 milliardar kroner. Ordrelista no er på 11 nybygg til ein samla verdi av omtrent 4,2 milliardar kroner.