Fjerninga av bommen på Krifast vert plutseleg fire gongar så dyrt, fordi vegvesenet ønskjer ny rundkøyring, kvileplass og kontrollstad der bommen stod.
- Dette er det Vegvesenet sjølve som må betale, og så kan vi betale for å få fjerna bommen, meiner ordførar i Tingvoll, Ole Morten Sørvik.
- Bør ikkje gå utover brukarane
Krifast, som er Kristiansund og Frei sitt fastlandssamband, skulle ha vore nedbetalt for fleire år sidan. No har fjerninga av bommen vorte utsett i ni nye månader. Statens Vegvesen sine planar om ei stor rundkøyring, rasteplass og ein eigen kontrollstasjon, har auka kostnadane med å fjerne bommen frå 10 til 40 millionar kroner.
- Denne rekninga bør ikkje gå utover brukarane, seier Sørvik.
- Ein må halde seg innanfor dei rammene som er lagt, på 10 millionar kroner. Utover det får vegvesenet finne pengane.
Seksjonssjef i Statens Vegvesen region, Leif Magne Lillebakk, meiner vegvesenet ikkje kan ta rekninga fordi kostnadsauken ikkje går over det som vart vedteke i Stortinget.
- Det har ikkje vore noko overskridingar i investeringskostnadane i forhold til det som vart lagt fram i stortingsforslaget, og det er den som legg til grunn korleis fordelinga mellom bompengar og statlege middel skal vere.