Liv Signe Navarsete saman med statssekretær Erlend Fuglum på Ålesund lufthamn Vigra.
Foto: Pål Kristian Lindseth / NRK– If it ain't broken, don't fix it, seier Liv Signe Navarsete, som vil jobbe mot nedlegging av 110-sentralar i distrikta.
Kommunal- og regionalministeren møtte brannsjef og mannskap ved 110-sentralen i Ålesund torsdag.
Det var i januar at Direktoratet for samfunnssikkerheit og beredskap føreslo å leggje ned halvparten av 110-sentralane.
Sentralen i Ålesund er éin av dei sentralane som er føreslått nedlagt. Det same er sentralen i Florø.
Dei tilsette har vore klare i sine synspunkt, og torsdag var dei tydelege i møte med ministeren.
- Les også: – Ein ekstremt uryddig prosess
- Les også: Lovar kamp for alarmsentralen
Uroa brannsjef
Brannsjef Geir Thorsen og avdelingsleiar Torfinn Vingen er begge kritiske til prosessen rundt 110-sentralane.
Brannsjef Thorsen er uroa over både framgangsmåtane dei siste månadane og beredskapen i fylket.
– Det er stor støtte i fylket for å behalde 110-sentralen her i Ålesund, seier brannsjefen til Navarsete.
Han meiner det er svært merkeleg med ei eventuell nedlegging når justisministeren har vore veldig tydeleg på at brann, helse og politi må henge saman.
– Då burde ein venta med å flytte på 110-sentralen til alt dette er på plass. Samstundes er det for mange 1- og 2-mannsbetente sentralar i fylket, så endringar må til. Men ein må ikkje forhaste seg, seier Thorsen.
Saka held fram under bildet.
Brannsjef Geir Thorsen (t.h.) og avdelingsleiar Torfinn Vingen legg fram meiningane sine i møte med Navarsete torsdag.
Foto: Olaug Bjørneset / NRK– Mange risikomoment i området
Thorsen meiner det er rart at ein vil leggje ned begge sentralane mellom Bergen og Trondheim.
– Spesielt når her er så mange risikomoment i området, som storm, skred, trafikk på havet og stor konsentrasjon av bedrifter som kan vere utsette for store ulukker.
Brannsjefen meiner det er veldig feil av direktoratet å berre sjå på folketal. Ein må også sjå på risiko, seier han til Navarsete.
Han meiner i tillegg at hurtigrutebrannen og Fjelltun-ulukka viser at dei er gode på beredskap i fylket.
– Ved å flytte sentralen vil vi redusere fagmiljøet og svekke kompetansen som vi har bygd opp over tid.
– Det er dumt å gjere strukturendringar før vi veit korleis vi skal organisere brann- og redningstenesta i landet, seier Thorsen.
Ser med skrekk og gru på Dagmar frå Trondheim
Eit anna eksempel er ekstremvêret Dagmar.
– I løpet av kort tid var vi seks mann på sentralen. Eg ser med skrekk og gru på ein ny Dagmar som skal handterast frå Trondheim. Det kjem ikkje til å gå, meiner Thorsen.
Vestnes-ordførar Geir Inge Lien, minister Navarsete og brannsjef Thorsen var godt fornøgde etter 110-sentral-møtet i Ålesund.
Foto: Ole-Ottar Høgstavoll / NRKAvdelingsleiar Vingen meiner talet på unødvendige alarmar i deltidsbrannvesenet vil gå opp som ein konsekvens av store sentralar.
– Dermed vil det gå utover rekrutteringa til deltidsbrannvesenet (journ.merkn. frivillige brannmenn- og kvinner).
– Og det er 1100 deltids-brannfolk her i fylket. Dette er alvorleg og ville blitt avdekka om det blei utført ei konsekvensanalyse, seier Vingen til Navarsete.
Vingen meiner heile prosessen har gått for raskt, noko som er grunnen til all støyen. Navarsete seier seg einig med avdelingsleiaren.
Navarsete vil ikkje rive ned
Navarsete er på besøk saman med Vestnes-ordførar Geir Inge Lien (Sp). Lien meiner nedlegging av 110-sentralen vil vere eit stort tap for Møre og Romsdal.
– Vi fryktar dette er ei sniksentralisering av kompetansearbeidsplassar. Så dette må vi arbeide for å stoppe, sa han på møtet.
– Vi må ikkje rive ned noko som fungerer, seier Navarsete til dei tilsette ved Ålesund brannstasjon.
Ministeren meiner ein må sjå på kva som er viktig for tryggleiken til folk.
Saka held fram under bildet.
Navarsete vil jobbe for at 110-sentralen i Ålesund skal bestå.
Foto: Ole-Ottar Høgstavoll / NRK– Ikkje dekning i 22. juli-rapporten
Navarsete er i tillegg klar på at nedlegginga av halvparten av 110-sentralane i Noreg ikkje har dekning i 22. juli-rapporten.
– Tvert om fekk brannvesenet mykje ros. Denne saka blir no løfta opp politisk via justisdepartementet sidan det har kome klage, seier Navarsete.
Ho slår fast at ho ikkje er justisminister.
– Men eg er kollega av justisministeren og eg vil bruke kreftene mine mot denne strukturendringa.
– Så får vi sjå kva resultatet blir. Vi skal i alle fall sørgje for at det blir ein god prosess, seier Navarsete – som altså jobbar mot å reversere ein nedleggingsprosess.
Den meldinga gleda både brannsjef Thorsen og avdelingsleiar Vingen.
Mange ministrar på Sunnmøre
Navarsete er ikkje den einaste på sunnmørsbesøk.
Helse- og omsorgsminister Jonas Gahr Støre besøker Ålesund sjukehus og Høgskulen i Ålesund.
Statsminister Jens Stoltenberg og fiskeri- og kystminister Lisbeth Berg-Hansen er til stades på årskonferansen i Fiskeri- og havbruksnæringas landsforeining.
Vi kjem tilbake med meir om dette seinare.
