Klokka 05.11 natt til søndag fekk politiet i Møre og Romsdal melding om at nokon hadde tatt seg inn i bar og restauranten Boteco i Kristiansund.
Der hadde ein mann i 60-åra brukt ei øks for å knuse seg inn på baren etter stengetid.
– Då politiet kom til staden sat mannen og drakk vin, fortel Eivind Klokkersund, operasjonsleiar i politiet.
Søndag hadde ei plate blitt festa over det knuste vindauge til Boteco.
Foto: Marius André Jenssen Stenberg / NRKTatt med inn til arresten
Mannen hadde også gjort ein del skadeverk inne på Boteco.
Operasjonsleiar i politiet, Eivind Klokkersund, seier dei ser alvorleg på hendinga.
Foto: Remi Sagen / NRKHan blei sjekka for skader av helsepersonell på staden før han blei tatt med inn til arresten.
– Vi vil avhøyre han i løpet av dagen for å få hans forklaring og så følge opp saka vidare, seier Klokkersund.
Politiet etterforskar saka vidare.
– Dette er ikkje ein åtferd som politiet ønskjer og vi ser alvorleg på det. Saka blir difor følgt opp frå vår side, seier Klokkersund.
– Trist
Øyvind Thorsen driv Boteco og var sjølv på jobb laurdag natt. Etter stenging og opprydding reiste han heim rundt klokka 04.00. Så, i 05.00-tida, ringde politiet.
– Eg er berre glad for at eg ikkje var der då det skjedde. Det er skummelt å tenke på, seier Thorsen.
Dei har så langt ikkje full oversikt over skadane, men ifølge Thorsen manglar det fleire flasker med alkohol. I tillegg til at vindauge er knust blei også deler av inventaret øydelagt då mannen tok seg inn i lokalet. Thorsen seier han mistenker at mannen ikkje har vore aleine om innbrotet, og har varsla politiet om dette.
– Eg synest der er trist at nokon har gjort dette, seier Thorsen.
Baren ligg i Skolegata i Kristiansund.