- Det var ein voldsom smell akkurat når det skjedde, og me forstod ikkje heilt kva som var skjedd, seier Kåre Stadheim. Han var med ferja då den krasja i kaia på Stranda måndag morgon.
- Les også:
Han fekk kuttskadar i handa då han og ein kollega fall inn i eit vindu midt inni salongen. Kollegaen fekk sterkare skadar enn han, med kutt i andletet og i ein finger.
- Tankevekkjar
- Det var ingen panikk. Me fekk god hjelp med ein gong av mannskapet, så det var ingen panikk hjå oss i alle fall.
Det er ikkje fyrste gong det skjer ulukker med ferjene langs kysten. Kanskje er det for mange.
- Det er ein tankevekkjar. Det byrjar bli veldig mange uhell, seier leiar i samferdselsutvalet i Møre og Romsdal Frank Sve.
- Det har store konsekvensar for dei som reiser. Me bør sjå på kva som gjer at det er så mange uhell, meiner han.
- Forventar betring
Sjøfartsdirektør Olav Akselsen er bekymra for dei mange uhella, og refsar reiarlaga som driv ferjene.
- Me har hatt fleire møter med ferjereiarlaga og tatt opp denne problemstillinga. Likevel ser me inga betring, seier Akselsen.
Dermed må dei på nytt må ta kontakt med reiarlaga for å få fokus på problema.
- Eg forventar då at dei set dette øvst på agendaen sin, for å finne ut kva som skjer, og kvifor, seier han.