Tidlegare i vår blei den omstridde, tidlegare eigaren, Tomislav Debeljak, dømd til å betale over 120 millionar kroner i erstatning etter konkursen av sunnmørsverftet Kleven.
Han bestemte seg for å anke til Høgsterett, men dei seier no nei til å behandle saka endå ein gong, opplyser bustyrar Bjørn Åge Hamre.
Dermed er dommen frå Gulating lagmannsrett rettskraftig.
– Det set eit endeleg punktum for ei ganske krevjande og langdryg sak der det har vore mykje på spel frå buet si side, seier bustyrar Bjørn Åge Hamre.
– Kor enkelt blir det å krevje inn pengane frå Debeljak?
– Det reknar vi med blir ganske krevjande, men vi er i ferd med å engasjere advokatar i Kroatia for å hjelpe til buet med den jobben.
Også Tryg Forsikring anka dommen, men også denne seier Høgsterett nei til:
«Ankeutvalet finn samrøystes at det ikkje er tilstrekkeleg grunn til at saka blir fremma for Høgsterett, jf. tvisteloven § 30–4. Anken vert derfor ikkje fremma.»
Bustyrar for konkursbuet til Kleven verft, Bjørn Åge Hamre.
Foto: Frode Berg / NRKBlei slått konkurs etter tre månader
I 2020 tok kroatiske DIV Group over verftet i Ulsteinvik, til stor glede og optimisme. Men berre tre månader etterpå blei verftet slått konkurs, og 441 tilsette permittert.
I åra etterpå har det vore to rettssaker.
I november 2023 blei Debeljak frifunnen i Hordaland tingrett, men lagmannsretten snudde og dømde han til å betale 120 millionar i erstatning. Tryg Forsikring måtte betale vel 30 millionar.
I tillegg måtte dei betale sakskostnader.
Lagmannsretten slo fast at konkursbuet hadde krav på erstatning for tap forårsaka av «Debaljaks aktlause handlingar og unnlatingar». Retten konkluderte også med at Debeljak handla i strid med aksjeloven §17–1 om styreansvar.
Debeljaks forsvarar sa i rettsaka at Debeljak hadde ein svært krevjande økonomi og familiesituasjon.
Slepp ikkje å betale
Lagmannsretten vurderte tidlegare i vår om det var grunnar for at den tidlegare eigaren ikkje skulle betale heile erstatninga.
Konklusjonen var nei:
«Sjølv om Debeljak våren 2024 fremla det som på fristen for bevisprovokasjon låg føre av etterspurde opplysningar, har han i etterkant framlagt svært lite dokumentasjon til belysning av sin reelle økonomiske situasjon. Han har vist til og dokumentert at han hadde svært avgrensa inntekt i 2022 og 2023, samt at han har forsørgingsbyrde for sju barn», står det.
– Han meiner at dommen ikkje er riktig
Tomislav Debeljaks advokat, Mari Wetlesen ved Deloitte Advokatfirma, seier fredag at ho har vore i kontakt med sin klient.
– Han er sjølvsagt veldig skuffa over at dommen frå Gulating lagmannsrett no er rettskraftig. Han meiner at dommen ikkje er riktig, og at han handla i Kleven Verfts interesse.
Wetlesen seier Debeljak no vil bruke tida framover på å fordøye nyheitene og utforske moglege neste skritt.
