Turistar tar seg til rette opp isstengd fjelltrapp: – Det kan få fatal utgang

For mange som besøker Ålesund er dei 418 trappetrinna opp til Fjellstua eit sjølvsagt mål, for å nyte den berømte utsikta over jugendbyen.

Måndag stengde kommunen trappene på grunn av is, som no også er dekt av snø. Men nokon har flytta på sperringa, og mange turistar og lokale har valt å gå opp.

– Det er framleis glatt å gå, og farleg å ferdast. I verste fall kan nokon skli og hamne over rekkverket og ned fjellsida. Det kan få fatal utgang, seier Martin Hessen, fagleiar for drift i Ålesund kommune.

Har ein broddar kan ein gå opp trygt, men dei seier dei ikkje kan skilje på det. Mange av turistane kjem med cruisebåtar og går utan broddar. Kommunen synest det er dumt at nokon har opna sperringa.

– Det er frustrerande. Vi stenger av ein grunn, det synest eg folk må respektere. No må vi bruke opp sårt trengde pengar for å sende nokon til å sperre igjen, seier Hessen.

Turistar sklir på isen

Turistar NRK har snakka med seier dei ikkje forstod at trappa var stengd, fordi nokon har flytta på sperringa.

– Eg berre fall før eg hadde gått ti meter. Det er min feil, eg såg ikkje isen, men det går greitt, seier franske Sophie Leneveu.

– Vil du prøve å nå toppen?

– Heilt klart, svarar ho, før ho får vite at trappene faktisk er stengde.

Britiske Gregory Roberts var ein av dei som gjekk til topps saman med kameraten Adam.

– Eg synest det var litt skummelt, men vi har ordentlege sko med grep. Utsikta var fantastisk, seier Roberts.

Nokre tok drosje ned

Drivar Ann Helen Støbak på Fjellstua-restauranten har sett fleire som har gått opp, og er ikkje overraska over at det skjer. Ho såg det same skje i fjor då vegen var stengd då.

– Er sperringa flytta på så tenker dei ikkje på det, cruiseturistane går der det er veg. Vi prøver å seie til dei at vegen er stengd, seier Støbak.

Dei har også hjelpt nokre med å bestille drosje ned igjen.

– Det er hakket verre å gå ned enn å gå opp. Det er jo ein del eldre folk som ikkje er skodde, så blei det kanskje litt vel mykje for dei, seier Støbak.