Drillpikene i Spjelkavik ligger i hardtrening før konkurransen.
Foto: privat1000 deltakarar møtast i EM Majorettes i Frankrike i helga. 12 drilljenter frå Spjelkavik skolekorps i Ålesund gler seg veldig. Dei har aldri konkurrert i utlandet før, sjølv om korpset har drilltradisjonar heilt tilbake frå 70-talet.
– Vi har ein litt annan stil enn drillpikene frå utlandet. Vi er vel meir tradisjonelle og har litt sånn 17. mai-stil, forklarar trenar Ida Kleiven Wågsholm.
Starta på 50-talet
Det finst to greiner av drill, korpsdrill og sportsdrill. Korpsdrillen står som oftast fremst i korpset og drillar til musikken. Det var på 50-talet at drillen kom til Noreg og i 1959 vart drillpikene med som ein del av 17. mai-toget. Det er berre sju år sidan Noreg deltok med landslag i EM for første gong.
Trenar seks timar i veka
Til saman er det 85 norske jenter frå heile landet som dreg til Frankrike. I kveld er det siste trening for drillpikene i Spjelkavik. Dei trenar seks timar i veka og no er det berre finpussen att.
– Akkurat no er eg ganske roleg, men somarfuglane i magen kjem til å dukke opp på flyplassen, ler Malene Magerholm.
Ho har drilla i snart 10 år og er lukkeleg over at hennar drilltropp klarte å kvalifisere seg til EM.
Nervøse
For ho og dei 11 andre jentene vert den aller viktigaste oppgåva i Franrike å vere samkøyrt og halde energien oppe under framsyninga. Å klare å styre nervøsiteten vert også viktig.
– Det er klart at nervane kjem til å kome når vi skal opptre for tusen personar. Men eg håper at vi gjer det bra, seier trenar Kleiven Wågsholm.
Dansar meir i utlandet
Ho ser at drillpikene frå andre land ikkje er så knytt opp til korpsmusikken, som ein er i Noreg. Dei dansar meir og mange av jentene har halde på sidan dei var fire-fem år.
– Vi har sagt at vi er nøgde, så lenge vi ikkje kjem på sisteplass, seier trenaren. Ho tippar at jentene vil kome midt på tabellen.
