Utlendingar tilbake på norske hotell: – Det har vore ein fantastisk sommar

Mila Andersson og Johan Magnuson frå Stockholm er to av dei som har valt å leggje sommarferien til Noreg.

– Det er kjekt å vere turist her. Folk er vennlege og dei ler veldig mykje. Det gjer vi ikkje i Sverige, vi er meir seriøse. Her er dei kjempetrivelege, seier Andersson.

Magnuson trur den svake norske krona er noko av grunnen til at fleire turistar vel å bu på hotell.

– Det blir nok meir attraktivt, om ikkje ville kanskje folk valt vandreheim eller camping, seier han.

Nesten dobling

Ved Molde Fjordhotell har dei hatt ein god sommar.

– Det har vore ein fantastisk sommar. Heile verda kjem på besøk igjen, og det er auke på alle frontar, seier Roy Heggdal.

Hotellsjefen på Molde Fjordhotell, snakkar om korleis sesongen har vore så langt.

Ifølgje Heggdal har hotellet hatt ein auke på 40 prosent i talet på besøkjande samanlikna med i fjor.

– Det har vore eit høgt trykk over lengre tid, og det eskalerte skikkeleg i sommar, seier han.

Styreleiar i Classic Norway, Erik Berg, seier at alle hotella deira har opplevd auke i talet på besøkjande. Han trur dei utanlandske gjestane har bidrege til ein vekst på minst 25 prosent.

Utlendingane er tilbake

Classic Norway hotella er ikkje åleine om å oppleve ein auke av utanlandske gjester.

Tal frå Statistisk sentralbyrå (SSB) viser ein kraftig auke av utlendingar som søv på hotell i Noreg. I juni var det totalt 2,7 millionar hotellovernattingar i Noreg, og heile 832.000 av desse var utanlandske. Det er ein oppgang på 18 prosent frå året før.

Arbeidsgivarorganisasjonen NHO Reiseliv merkar at det har vore ein god sommar for dei fleste av medlemmane deira.

– Den største forskjellen frå i fjor er at utlendingane er tilbake. I fjor var det framleis postpandemi-stemning, men i år er vi nok meir tilbake til det som var normalt før pandemien, seier administrerande direktør i NHO Reiseliv, Kristin Krohn Devold.

Aina Aalen Bjerkvik, som er direktør på Quality Hotel Waterfront i Ålesund, fortel at dei også opplever ein auke av utanlandske turistar.

– Eg har ikkje fått statistikken endå, men det har vore fleire utanlandske i år enn i fjor, seier ho.

– Er det ein nasjon som skil seg ut?

– Vi ser ein auke av amerikanarar, og det er veldig gledeleg, for dei bruker mest pengar, svarer ho og ler.

– Dei rømmer frå varmen

Både Roy Heggdal og Aina Aalen Bjerkvik trur den svake norske krona bidreg til at fleire utlendingar vel Noreg som feriemål.

Men Bjervik trekkjer også fram ein annan faktor:

– Akkurat no handlar det også om temperaturar i resten av Europa. Det høyrer eg frå turistane som kjem hit, dei rømmer frå varmen og skogbrannane, seier ho.