Øyafestivalen i Oslo har sidan starten satsa tungt på å ha ein miljøprofil med blant anna kjeldesortering og økologisk mat. I år satsar dei på at alt av tallerkenar, bestikk og ølglas skal vere mogleg å kompostere. Ølglasa er laga av ein plasttype som blir kalla PLA.
– Det er laga av det vi vanlegvis kastar når vi lagar mat av potet og mais. Så desse produkta er laga av noko som eigentleg skulle bli søppel. Dette er så fornybare ressursar som det kan bli, seier miljøsjef Cathrine Røsseland til NRK.
Manglar gode nok anlegg
Dagleg leiar i konsulentselskapet Mepex, Frode Syversen, har arbeidd med gjenvinning i 30 år. Han meiner at intensjonen med PLA-glasa er god, men får liten effekt fordi Noreg ikkje har gode nok system til å handtere denne typen avfall.
– Anlegga i Noreg er ikkje eigna eller dimensjonerte for å handtere dette. Slik sett blir dei nedbrytbare produkta eingongsprodukt som ikkje går inn i ein sirkulær økonomi.
Men Røsseland forteller at Øyafestivalen har fått ein avtale med eit komposteringsanlegg i Sogn og Fjordane, SIMAS, som skal prøve å bryte ned PLA-plasten. Denne løysinga fant dei med hjelp frå Norsk Gjenvinning.
– Produsenten av produkta vi bruker var tydeleg på at glasa kan komposterast. Men det var ikkje like tydelege på korleis og kvar. Difor har vi måtte finne ut dette, seier Røsseland.
- Les:
- Les:
Men Syversen er ikkje overtydd fordi man ikkje veit kva slags jord man får ut av PLAen. Han meiner festivalen driv ein form for «grønvasking» når dei tar i bruk glasa.
– Det er tvilsamt om dette vil ha nokon effekt. Difor blir det ei symbolhandling. Festivalen må vere opne om kva som gir miljøeffektar, og ikkje drive med «green-washing», som eg meiner dette til ein viss grad er.
– Vi vil prøve nye løysingar
Men for å finne tiltaka som gir effekt, må ein kunne prøve og feile, meiner Øyafestivalen.
– Vi skal vere i front på nye løysingar. Då kan vi ikkje stoppe ein prosess fordi vi trur det kanskje ikkje går. Det ikkje sikkert alle løysingane vi prøver er perfekte, men vi har lyst å prøve, seier miljøsjef Røsseland.
PLA-glasa er berre eit av fleire miljøtiltak på Øya. Kvar dag plukkar og sorterer 150 frivillige søppel som festivalgjengarar legg igjen. I tillegg er det lagt opp til at publikum i forkant skal kjeldesortere avfallet sitt på fleire avfallsstasjonar.
- Les: