Etter at 456 kvinnelege skodespelarar stod fram og fortalde om seksuelle overgrep og krenkingar i svenske teaterverda i eit stort opprop i Svenska Dagbladet onsdag, blei sjefane for dei tre største teaterinstitusjonane i Sverige kalla inn til krisemøte hos kulturminister Alice Bah Kuhnke torsdag. Ho seier til Expressen at ho ser alvorleg på skuldingane som kjem fram.
– Dette har vore eit alvorleg møte der eg har gjort det klart at regjeringa ikkje aksepterer det som går føre seg. Eg krev endring.
I møtet måtte Dramatensjef Eirik Stubø, Riksteaternsjef Magnus Aspegren og sjef ved operaen, Birgitta Svendén, gjere greie for kva dei vil gjere for å betre arbeidssituasjonen i institusjonane. No vil Kuhnke også kalle inn styreleiarane ved nasjonalscenene.
– Dette er definitivt eit spørsmål om leiing. Det ser heilt klart ut som om store delar av kulturbransjen lir av ein problematisk teiekultur, seier ho.
Krisemøte ved Dramaten
Torsdag morgon blei det også hasteinnkalla til eit møte i Dramaten på grunn av oppropet. 78 av kvinnene som har skrive under, har arbeidd ved teateret. Men den norske teatersjefen ved Dramaten, Eirik Stubø, seier til SVT at han er overraska over opplysningane som har kome fram. Han seier at han berre kjenner til to tilfelle av seksuell trakassering i den tida han har vore sjef, og at dette var verbal trakassering.
– Men det som blir skildra i oppropet har ikkje kome til overflata. Det er kjernen i problemet. Kvifor har ikkje vi fått vite dette?
Stubø han vil ta tak i problemet, og finne ut kven som står bak dei seksuelle overgrepa.
– Dersom vi finn ut kven dei er, og mennene framleis jobbar her, vil det få konsekvensar. Deter utvitydig i alle handbøkene våre at det er nulltoleranse for slikt.
- Les:
- Les:
Fleire teater vil gjere endringar
Før han tok over sjefsjobben ved Dramaten, var Stubø kunstnarisk leiar ved Kulturhuset Stadsteatern i Stockholm. No har etterkomaren hans, Anna Takanen, laga ein ny likestillingsplan.
– Medarbeidarane våre skal kjenne seg trygge på at vi har eit felles verdigrunnlag, at seksuell trakassering er uakseptabelt og forbode, og at vi skal jobbe saman om dette, seier ho til Expressen.
- Les:
- Les:
Også sjef for Riksteatern, Magnus Aspegren, seier til SVT at oppropet og møtet i dag kjem til å føre til endringar.
– Vi skal sjå på korleis vi utfører det kunstnariske arbeidet vårt, og skape ein struktur der alle kan kjenne seg trygge uansett kva for tilsetjingsform dei har.