– Vi er redde for at prosessen no stoppar heilt opp, og at vi må leve med dagens E6 i all framtid, med alle dei ulempene det fører med seg for oss bebuarar, seier Asle Birkeland i Vingar Grendeutvalg.
Like før jul sa Miljødirektoratet nei til å leggje ei ny bru gjennom Lågendeltaet Naturreservat ved Lillehammer. Dei einaste som kan endre vedtaket er regjeringa.
– Her ser vi ikkje ein einaste grunn til å gi dispensasjon, har direktør Ellen Hambro i Miljødirektoratet sagt.
Tysdag møtte både NHO, bebuarforeiningar og politikarar opp ved Vingnesbrua for å vise kva dei meiner om vedtaket.
Meiner det blir meir trafikkfarleg
Stortinget vedtok bygginga av ny E6 gjennom Innlandet heilt til Otta i 2019. Målet var å få ned talet på ulykker og sikre gode vilkår for transport og personbilar.
Birkeland seier det vil vere fleire ulemper om ein droppar utbygginga.
Han meiner det vil føre til meir kø, støy, svevestøv og trafikkfarlege situasjonar i nærområdet. Dette på grunn av trafikantar som køyrer lokale omvegar for å komme fortare fram når det blir kø, meiner han.
NHO, som også var til stades, meiner E6-nei vil vere negativt for transportbransjen, mellom anna for transport av fisk.
– Det har store konsekvensar for Innlandet si utvikling om E6 ikkje blir bygd, meiner regionsdirektør Jon Kristiansen i NHO Innlandet.
– Vi vil ikkje ha den løysinga vi har i dag med at E6 går tvers gjennom det mest sårbare delen av Lågendeltaet. Det må regjeringa og miljødirektoratet skjønne, slik at vi får lagt vegen i tunnel og får ein betre gjennomfartsåre her, seier fylkesordførar Even Alexander Hagen (Ap).
– Siger for naturen
Til no har Nye veier fått ferdig 43 kilometer frå like sør for Hamar fram til Moelv. Bygginga nordover skulle starte i år. Men så sa det stopp.
Statsforvaltaren i Innlandet sa ja til dispensasjon frå verna i fjor haust. Men Naturvernforbundet og den lokale aksjonsgruppa Lågendeltaens Venner klaga, og dei vart høyrde.
Lars Haltbrekken i SV har engasjert seg i vern av Lågendeltaet. Han har uttalt at vedtaket i Miljødirektoratet ikkje burde komme som eit sjokk på nokon.
Aller minst på Nye veier, som han meiner burde avklart dette, før dei brukte så mykje tid og pengar på brua gjennom naturvernområdet.
– Dette er ein siger for naturen. Vi kan aldri meir leggje veg gjennom naturvernområde, har han tidlegare sagt.
Miljødirektoratet grunnar avgjerda si slik: – Direktoratet har avslått søknaden om dispensasjon frå verneforskrifta fordi vi meiner vilkåra for dispensasjon ikkje er til stades.
Store summar
Nye veier har brukt 1,1 milliardar på å planleggje den nye vegen frå Moelv til Øyer. I dette ligg planarbeid, regulering og erverv til grunn.
Men talet er i praksis mykje høgare. Statens vegvesen, kommunen og Statsforvaltninga har og brukt store summar på planlegging.