Noah (19) nektar å gi opp kampen for Lågendeltaet

Denne veka aksjonerte Lågendeltaets venner i Hovemoen, eit skogsområde tett inntil Lågendeltaet naturreservat.

Eit titals demonstrantar stoppa hogstmaskinene som har vore i sving sidan nyttår. Dei har tatt ut ei lang, brei gate av furuskog, heilt ned til Lågendeltaet naturreservat, nok til ein firefelts motorveg.

– Vi aksepterer ikkje at hogsten er starta her. For mykje er uavklart i saka enno, seier Noah Myklebust Christensen.

Naturvernarane har fått ny glød, etter at programleiar Bård Tufte Johansen trekte fram Lågendeltaet i NRK-serien Oppsynsmannen.

Med denne gløden gjekk Christensen fremst for å stoppe maskinane. Med seg hadde han aksjonistar frå Lågendeltaets venner.

Mykje brukt område

Det er Nye Veier AS som skal bygge ny E6 frå Biri til Øyer. Blant anna gjennom Hovemoen. Men det er Innlandet fylkeskommune som eig og høgg skogen.

– Dette området er planlagt som veg, og vi har vald å hogge der nå. Det er verdfull skog, som vi nå tek ut og omset på heilt vanleg måte.

Det seier eigedomssjef i Innlandet fylkeskommune, Per Anders Bakke.

Frå før er store delar av Hovemoen brukt til næringsformål. Grustak, reinseanlegg for Lillehammer kommune og handel.

Likevel er det att delar med høg furuskog med skogsstiar, eit mykje brukt trenings- og friluftsområde.

Politiet rykka ut

Politiet kom til staden, og dei sørga for at skogsmaskinene stoppa for demonstrantane.

– Vår oppgåve er å gjere dette så trygt som mogleg, slik at ingen blir skadde, seier innsatsleiar Trond Bjørge.

– Det er farleg å gå nær skogsmaskinene. Så her kan ingen gjere noko så lenge det er demonstrantar her.

Fryktar gass frå skifer

Lågendeltaets venner rettar aksjonen sin både mot Fylkeskommunen og Nye Veier. Dei kjøper ikkje forklaringa om at Nye Veier ikkje har noko med hogsten i Hovemoen å gjere.

– Nye Veier kan ikkje jobbe som om vegen er avklart. Det er den ikkje, for vi har ei klage liggande i Miljødirektoratet, seier Noah Myklebust Christensen.

Klaga Christensen viser til, handlar om giftig gass frå skifer.

Store delar av ny E6 forbi Lillehammer skal gå i tunnel på Vestsida. Frå tunnelen kjem det veldig mykje masse, tenkt til å bygge vegen vidare sørover mot Biri.

Naturvernarane meiner å ha prov at skiferen inneheld syre, som kan skilje ut farleg gass og dei har klaga.

Statsforvaltaren i Innlandet avviste klaga, men naturvernarane tok den vidare til Miljødirektoratet seint i fjor haust. Der får NRK til svar at dei framleis undersøker saka og ikkje veit når svaret er klart.

Nye veier ventar på avgjerda

Eigedomssjef Per Anders Bakke i Innlandet fylkeskommune seier at klaga ikkje har utsetjande verknad for dei, altså kan hogginga i Hovemoen gå føre seg som planlagt.

Medan Utbyggingsdirektør Espen Almlid i Nye Veier, seier at dei må respektere klaga og vente på svar frå Miljødirektoratet.

– Vårt arbeid mellom Biri og Lillehammer har stoppa opp. Vi kan ikkje gjere noko med tunnelen så lenge klaga ligg i Miljødirektoratet.

Han seier han forstår at aksjonistane gjerne vil få fram bodskapen sin.

Men mykje står på spel. Om dei må køyre bort massen, må prosjektet endrast, seier Espen Almlid.

– Da må vi sjå på korleis vi skal bygge vegen på anna måte. Og kostnadane vil sjølvsagt auke, fordi vi må køyre bort veldig mykje stein.

Samarbeider om løysingar

Da regjeringa godkjente å legge ei bru over naturreservatet Lågendeltaet, fekk Nye Veier sterke krav på seg til å gjere naturskadane så små som mogleg.

Både der brua skal gå, men også i området i Lågendeltaet der vegen går i dag. For den eksisterande vegen tek ein mykje større del av

– Nå har vi eit godt samarbeid med Lillehammer kommune om å finne gode løysingar, seier Espen Almlid.

Men Lågendeltaet venner slår seg ikkje til ro.

– Vi gjev ikkje opp å hindre vegbygginga, sjølv om regjeringa har bestemt at den skal byggast, seier Noah Mylkesbust Christensen.

Sjå Oppsynsmannen her: