– Heilt konkret kjem desse pengane til å føre til at vi får 700 nye arbeidsplassar.
Det seier Morten Brandtzæg. Han er konsernsjef ved våpenprodusenten Nammo.
Onsdag kom statsminister Jonas Gahr Støre og forsvarsminister Bjørn Arild Gram til verksemda på Raufoss med ei milliardkontrakt.
Krig i Europa fører til auka etterspurnad og behov for ammunisjon. Difor må Nammo produsere mykje meir.
– Det er på grunn av eit beksvart bakteppe. Det er på mange måtar resultatet av ein utrygg verdssituasjon at dette blir gjort, seier Brandtzæg.
Mange nye arbeidsplassar
Trass det dystre bakteppet er totningane glade for milliarden staten no legg i våpenproduksjon på Raufoss.
– Eg blir jo optimistisk, seier ordførar Tonje Bergum Jahr (Ap).
Ho trur investeringa staten gjer i hjørnesteinsbedrifta i Vestre Toten kan føre til fleire innbyggarar og auka aktivitet i kommunen.
– Denne type investering fører til 700 nye arbeidsplassar dei neste seks åra. Det tek tid å bygge opp, men kontrakten betyr framleis vekst for området her, heilt klart, seier Jahr.
Treng folk med ulik kompetanse
Byen på Toten har knappe 8000 innbyggarar.
Når dei innan 2030 truleg treng rundt 700 nye tilsette ved Nammo, må dei leite utanfor kommunen, seier Brandtzæg.
– Vi må ta frå heile Innlandet, seier han.
Og det er ikkje knapt av folk eller kunnskap våpenprodusenten treng.
– Vi treng maskiningeniørar, fagarbeidarar, økonomar, prosjektleiarar, teknikarar, byggeleiarar og så vidare.
Men han trur ikkje det blir vanskeleg å finne folk til å fylle dei nye arbeidsplassane. Det trur heller ikkje Nav-direktør i Innlandet, Bjørn Lien.
– Det verkar som om dette er trygge arbeidsplassar i overskodeleg framtid. Dette trur eg gir gode moglegheiter for mange, seier Lien
– Det er nok av folk å ta av. Utfordringa blir å få tak i den gode kompetansen som ein treng for å utvikle og skape dei arbeidsplassane og løysingane som Nammo skal levere på her, seier Lien.
Bad om 850 millionar
Milliardkontrakten frå staten kom ikkje ein dag for tidleg for våpenprodusenten.
I fleire rundar har Nammo bedt om støtte for å auke kapasiteten til å produsere granatar som er etterspurt frå Ukraina og Nato-land.
Våpenprodusenten bad om 850 millionar i investeringar.
Per 1. desember i fjor hadde dei fått 75 millionar kroner av staten til formålet. Staten eig 50 prosent av Nammo.
– Samarbeidet med styresmaktene bidreg til ein mykje sterkare og kjappare produksjonsauke enn det vi kunne fått til åleine, seier Brandtzæg.
Fleire aksjonar mot hovudkontoret
Den siste tida har det vore fleire aksjonar ved hovudkontoret til Nammo på Raufoss.
I desember lenka aksjonistar frå Palestinakomiteen seg fast utanfor porten. Dei hevda at våpen frå Nammo blir brukt til å drepe palestinarar i Gaza. Nammo avviser desse påstandane.
Tidlegare i desember dukka også aksjonsgruppa «Aktivister for Palestina» opp under ei hoppkonkurranse i Lysgårdsbakken i Lillehammer.
Det norske hopplandslaget har sponsoravtale med Nammo, og aksjonistane kritiserte dette samarbeidet.
– Hopplandslaget må bryte samarbeidet med Nammo no, ropte demonstrantane.