Øyvind Halleraker (H) og Kjellbjørg Lunde (SV) har vore tydelege røyster i debatten om 30-milliardarsprosjektet Hordfast mellom Os, Tysnes og Stord.
Lunde er motstandar. Halleraker er leiar for selskapet Hordfast AS. Dei kjempar for å få planane gjennomført, mellom anna ved å besøke statsrådar og bestille eigne rapportar.
Høgre sin tidlegare samferdslepolitiske talsperson reagerer på at Lunde fleire gonger har kalla han «lobbyisten Halleraker».
I innlegget «Pinlig frå Kjellbjørg Lunde - igjen!» i avisa Sunnhordland svarar Halleraker blant anna dette på SV-politikaren sitt siste innlegg:
«Kjellbjørg Lunde oppviser igjen et debatt- og saklighetsnivå som vi oftere finner blant nettrollene i kommentarfeltene i sosiale medier».
– Eg plar ikkje svare henne, men det rant rett og slett over. Difor skreiv eg at debattforma hennar minner om nettroll, seier Halleraker til NRK.
– Usakleg
Kjellbjørg Lunde er kommunepolitikar for SV på Stord, og har vore både stortingspolitikar, parlamentarisk leiar og nestleiar i partiet.
I Hordfast-innlegget Halleraker reagerer på, skriv Lunde at ho reknar med at samferdsle- og kommunalministeren «lyttar meir til politikarane som har eit overordna ansvar for at kronene blir brukt der det er størst behov, enn til ein betalt lobbyist som arbeider for eitt einskild prosjekt».
– Han liker ikkje at eg kallar han det han er betalt for å vere, nemleg lobbyist, seier Lunde.
– Kva synest du om at han samanliknar debattstilen din med den til nettroll?
– Det synest eg er veldig usakleg. Eg har jo ikkje skjelt han ut, eg skriv berre at han er ein lobbyist. At det skal vere eit omgrep som nettroll bruker, synest eg ikkje har noko med realitetane å gjere. Så det får stå for hans rekning, seier Lunde.
Halleraker viser til at Hordfast AS er eigd av blant andre NHO og ni kommunar. Han meiner Lunde kom med feilaktige påstandar, og angrar ikkje på språkbruken.
– Ho nyttar alle høve til å personifisere eit stort og viktig prosjekt som Hordfast som noko «lobbyisten Halleraker» arbeider for, meir eller mindre åleine. Det er ein måte og debattform som er uriktig, meiner han.
– Generell tendens
Retorikkprofessor Jens Elmelund Kjeldsen meiner ordbruken mellom Halleraker og Lunde er uskuldig.
– Men problemet med å snakke om korleis folk seier ting, er at vi sluttar å snakke om saka, påpeiker han.
Då er kunsten å droppe personleg kritikk og fokusere på temaet, seier Kjeldsen.
– I utgangspunktet er verken det han eller ho seier så alvorleg, men det illustrerer ein generell tendens i politikken: I våre dagar skal det ikkje så mykje til før vi ikkje snakkar om saka, seier han.