– Dette fungerer veldig greitt. Eg lærer ting av han, han lærer ting av meg, seier Victor Tombre om den såkalla kvammakompisen sin, Ahmad Albhai Kheder.
Dei to ungkarane sit i ei leilegheit i Norheimsund og spelar bilspel på TV-en, medan kaffien står på kok. Dette er ein del av integrering- og inkluderingsprosjektet Kvammakompis, som er oppfunne av Grannehjelpa i Kvam.
– Gjer integrering lettare
Prosjektet går ut på at ein framandspråkleg kvemming og ein kvemming med norsk bakgrunn skal vere kompisar i tre månadar for å bli betre kjend og lære av kvarandre.
– Ein får treffe nye folk frå Kvam, som ein kan bruke tid saman med og lære god norsk av. Det gjer det lettare å bli integrert i samfunnet, seier Kheder.
Han kom frå Syria til Noreg i 2014, og meiner prosjektet har mange fordelar.
– Det er opp til oss sjølve kva vi vil finne på. Vi møtes omtrent ein gong i veka, når det passar for oss begge, fortel Tombre.
- Les òg:
Lærer av kvarandre
Tombre er frå Norheimsund og fekk spørsmål frå Grannehjelpa om han ville vera med på prosjektet. No er han glad han takka ja.
– Vi er to ungkarar i trettiåra, så vi er ikkje så ulike. Det er jo ikkje «berre berre» å kome rett til Kvam utan å ha vore her før. Han får øvd seg på norsk og eg lærer meir om integrering. Dette er ein vinn-vinn-situasjon, seier Tombre.
Så langt har resultata frå prosjektet vore gode. Mange har funne tonen og held kontakten vidare, fortel prosjektleiar Rut Oppedal Rasmussen.
– Det er viktig for oss at dette er eit lågterskeltilbod. Dei som deltek i prosjektet skal møtast seks gonger og kvart møte varar i ein time, men dei kan sjølvsagt møtast meir, seier Rasmussen, som òg er frivilligkoordinator ved Grannehjelpa i Kvam.
Fleire kommunar gjer det same
KvammaKOMPIS starta opp våren 2016, og ein er no i gong med andre gruppe. No breier prosjektet om seg.
– Vi har fått spreidd det til mange andre frivilligsentralar. Det har blitt tatt veldig godt i mot, og no har det blitt Aukrakompis, Timekompis, Fitjarkompis, i Tysnes har dei blitt Tysnesven, og både Hornindal og Stord er i gang med liknande prosjekt, seier Rasmussen.
Ho fortel at tilbakemeldingane i Kvam har vore over all forventing.
– Alle svarte at dei hadde lyst å fortsette og vil møtast igjen. Vi lærer mykje av kvarandre, og alle er ressursar i dette prosjektet.
- Les òg: