– Det flyr jamleg jagarfly over meg, og det bråkar noko ekstremt. Hotellrommet ristar, fortel Myksvoll til NRK like før klokka 07.30 i dag tidleg.
I løpet av natta har han berre fått to timar med søvn.
– Eg har framleis ikkje heilt oversikt over situasjonen. Det ser ut til at myndigheitene har slått tilbake kuppet, men at det ikkje er heilt over endå, seier Myksvoll.
- LES OGSÅ:
Kaotisk
Han driv også nettsida Tyrkisk Politikk, og har etablert seg som ein ekspert på den politiske situasjonen i landet. Han har vore i dramatiske situasjonar i Istanbul før, og var svært nær å hamne midt i terror-eksplosjonen i Istanbul si handlegate i mars i år.
I natt har han haldt ein lav profil, og haldt seg i dekning på hotellrommet.
– Eg har ikkje følte meg utrygg, men det er ganske kaotisk her. Det høyrdest ut som det var eksplosjonar i natt, fortel Myksvoll.
– Det har flydd helikopter over byen gjennom natta, og med jamne mellomrom kjem lågtflygande jagarfly. Dei flyr raskt og bryt lydmyren, noko som merkast godt, fortel Myksvoll frå hotellrommet sitt i Istanbul.
- LES OGSÅ:
Store mengder folk i gatene
Det har også vore store mengder folk i gatene i byen i natt.
– Eg såg ei gruppe på hundrevis, kanskje tusenvis, av menneske som gjekk mot Taksim-plassen tidleg i natt. Nokre timar seinare kom dei jublande tilbake, truleg fordi kuppet var slått ned. Då køyrde også brannvesenet gjennom gatene med sirenene på, i det eg tolka som ei feiring, fortel Myksvoll.
UD ber no folk som ikkje må la vere å reise til Tyrkia. Myksvoll har førebels ikkje avgjort korleis han skal ta omsyn til situasjonen vidare.
– Eg må sjå korleis utviklinga blir utover morgonen. Det er ikkje gitt at det er utrygt å vere ute i dag, men eg vil følgje med på kva mellom anna UD melder, seier Myksvoll.