Gjev ikkje opp Vestlandsregionen

Rogaland fylkeskommune sa tysdag nei til ei samanslåing av Hordaland, Rogaland og Sogn og Fjordane.

I forslaget som blei samrøystes vedtatt, står det at Rogaland skal bestå som eige fylke, men dersom regionane blir tilført nye oppgåver, vil ein vurdere å samarbeide med Hordaland.

– Det er klart eg skulle ønskje at Rogaland gjekk inn for intensjonsavtalen, seier fylkesordførar i Hordaland, Anne Gine Hestetun.

Ho er likevel trygg på eit breitt ja når fylkestinget i Hordaland skal gjere sitt vedtak på onsdag.

– Ein må hugse at dette er første del av prosessen. Vi har gjort mykje grunnlagsarbeid som no skal takast vidare. Regjeringa og Stortinget har eit godt utgangspunkt for å fatte vedtak som kan byggje ein sterk Vestlandsregion, seier Hestetun.

• Les òg: Vurderer vestlandsregion uansett hva Rogaland sier

Optimist

Ho meiner det er eit paradoks at det er regjeringa sine eigne parti og Venstre som stemte mot samanslåinga i Rogaland.

– Eg er likevel optimist. Topp-politikarane i dei tre fylka har i forhandlingar velsigna denne planen samrøystes, så eg trur me har fleire sjansar framover, seier Hestetun.

Fylkesordførar Sogn og Fjordane, Jenny Følling, seier vedtaket i Rogaland betyr at avtalen mellom dei tre fylka ikkje gjeld lenger.

– Det betyr at intensjonsplanen vi har forhandla fram mellom dei tre fylka ikkje kan gjennomførast. Vi tar sjølvsagt vedtaket i Rogaland til etterretning, seier Følling.

Ho vil no føre samtale vidare med Hordaland, eventuelt med Møre og Romsdal.

• Les òg: SV krever folkeavstemning om nytt storfylke

– Heldt oss til «plan A»

– Det kjem no frieri frå fylke både frå nord og sør. Kjem de til å halda dykk til Sogn og Fjordane, eller kan det kome nye forslag på bordet?

– Det er klart at i slike prosessar kan det skje ting over natta, men er det ein ting eg er heilt sikker på så er det at det kjem til å bli eit breitt vedtak i Hordaland omkring intensjonsavtalen som ligg i bordet. Eg vil ikkje spekulere i andre løysingar no, seier fylkesordførar i Hordaland, Anne Gine Hestetun.

Òg fylkesordførar i Rogaland, Solveig Ege Tengesdal, synest det er trist at Rogaland seier nei til Vestlandsregionen.

– Det er eit nederlag at vi ikkje har klart å formidle kva ein større region enn Rogaland kan komme til å bety. Det er ein prosess som langt på veg har vore prega av tru og tvil og det syns eg er trist, seier Tengesdal.

• Les òg: Dei vil, men naboane tvilar

Dette betyr likevel ikkje at situasjonen er avklart.

– No treng vi ei avklaring frå Stortinget si side. Ein må få tydelegare fram kva oppgåver ein har tenkt å flytte til eit regionalt nivå. Så er det opp til Rogaland fylkesting i neste omgang å gjere vedtak basert på det som blir gjort av endringar frå Stortinget si side, seier Tengesdal.