Lisa Holm vart sist sett då ho skulle heim frå jobben på ein kafé på Kinnekulle utanfor Lidköping. Mopeden hennar er funnen med nøkkelen i tenninga.
Over 900 frivillige leita etter jenta på onsdag, ifølgje lokalavisa Nya Lidköping-Tidningen. Også politi og hundepatruljar, helikopter og hestar deltok i søket. Leitinga held fram torsdag, i jordbruksområdet på sørvest-sida av Vanern i Västra Götaland.
– Det var om lag 300 meter i diameter i starten. No utvidar vi til kring 10 kilometer. Alle tilgjengelege ressursar skal gå gjennom dette området, seier pressetalsmann Stefan Gustafsson ved politiet torsdag morgon.
Sjekkar ut mystisk video
Etterforskarane har også fått tips om ein mystisk video som er publisert på Youtube under namnet til Lisa Holm. Det korte klippet viser ei digital klokke som tel ned frå eitt minutt med ein tikkande lyd i bakgrunnen
Personlege eigedelar funne i ein åker
Hovudteorien til politiet er at jenta er utsett for noko kriminelt. Langs ein grusveg nokre kilometer frå kafeen har politiet funne delar av ein mobiltelefon som truleg høyrer til Holm.
I det same området vart det onsdag kveld funne personlege gjenstandar som truleg høyrer til 17-åringen, blant anna ein hanske og delar av ei klokkereim, skriv Expressen.
Har fått tips om mistenkeleg mann
Etterforskarane ser no nærare på ein tidlegare straffedømd mann, skriv Nya Lidköpings-Tidningen. Men det er uvisst om han noko med saka å gjere.
– Vi sjekkar alibiet til mannen. Vi har fått inn veldig mange tips om denne mannen, som har figurert veldig mykje på internett, seier politileiar Lars Johansson i Skovde-politiet.