Olesya (21) overlevde skot i halsen

«Eg lever! Takk til alle som støtta meg og bad for meg, Eg er på sjukehuset men tilstanden min er stabil!» skriv Olesya Zhukovskaya på Twitter-profilen sin fredag ettermiddag.

Den unge medisinstudenten Zhukovskaya har blitt eit symbol på valden som herjar i gatene i Ukraina etter at ho torsdag blei skoten i halsen då ho jobba som frivillig på Uavhengigheitsplassen i den ukrainske hovudstaden.

«Eg døyr»

Torsdag var den dødelegaste dagen hittil i den politiske uroa i Ukraina. Minst 70 demonstrantar vart drepne og over 500 såra i kampane, ifølgje opposisjonen.

Zhukovskaya var til stades midt i skotvekslingane i sentrum av Kiev for å hjelpa dei mange som var såra då ho sjølv fekk ei kule i halsen.

• LES OGSÅ: - Verste blodbadet i Kiev sidan krigen

Den førre tweeten hennar «eg døyr» blei fanga opp og kringkasta verda over. Sidan har alle venta på eit livsteikn frå kvinna.

Eit bilete viser angiveleg Zhukovskaya som tek seg til det blodige skotsåret i halsen medan ho blir frakta vekk av meddemonstrantar.

21-åringen blei frakta til sjukehus for behandling. Tilstanden hennar etter operasjonen var lenge alvorleg, ifølgje legen Oleh Musiy, den medisinske koordinatoren til opposisjonen.

Nyval og grunnlovsendringar

Dei siste opplysningane frå helsestyresmaktene i Ukraina er at 77 er drepne og 577 såra sidan kampane mellom politi og demonstrantar for alvor braut ut tysdag denne veka.

Situasjonen har vore svært spent og det har gått føre seg intense forhandlingar i den ukrainske nasjonalforsamlinga. Fredag føremiddag enda diskusjonane i eit slagsmål mellom fleire av parlamentsmedlemmene.

Fredag morgon opplyser kontoret til president Viktor Janukovitsh at det er semje mellom regjeringa og opposisjonen.

Den politiske avtalen medfører blant anna nyval innan september, innføring av ei koalisjonsregjering med nasjonal støtte og endringar i grunnlova som innskrenkar makta til presidenten.

Fredag har tilstandane i Kiev vore langt rolegare enn gårsdagen, men ifølgje politiet skal demonstrantane ha opna eld mot dei og prøvd å pressa seg fram mot parlamentsbygget.

Ei større gruppe politimenn som fredag gjekk over på demonstrantane si side, blei hylla som heltar på Maijdan-plassen med tilropa «flinke gutar, flinke gutar» frå folkemengda.