Kjempar for ektemannen

– Situasjonen hans er ikkje bra, verken psykisk eller helsemessig. Det er heilt normalt i hans situasjon, grunna all uvissa, fortel Ensaf Haidar til Ole Torp.

I Aktuelt på NRK2 kl. 20.15 møter du i kveld kona til den saudiarabiske bloggaren Raif Badawi, som vart dømd til 10 års fengsel og 1000 piskeslag for å ha utfordra moralske og religiøse autorieter i Saudi-Arabia.

• Les: Piskingen av Raif Badawi utsatt igjen

Har fått 50 av 1000 piskeslag

Det er gått eit år sidan bloggaren bak sida «Free Saudi Liberals» fekk den strenge dommen. Dei første piskeslagene falt 9. januar i år etter fredagsbønnen, men av medisinske årsaker har han unngått ytterlegare mishandling.

Badawi sit framleis i fengsel i Saudi-Arabia, mens kona bur i eksil i Canada med deira tre barn.

Overraska over den strenge dommen

På spørsmål om ho har kontakt med ektemannen, svarer Ensaf Haidar at han ringer iblant, men berre for korte samtalar.

– Vart du overraska over den strenge dommen?

– Sjølvsagt. Eg er svært overraska og sjokkert. Han hadde berre praktisert sin rett. Eg hadde ikkje trudd at han skulle få ein så valdeleg dom, seier Haidar, og understrekar at det framleis er eit sjokk for ho.

Ho er uroa for konsekvensane om piskeslaga vert gjenopptekne.

– Eit menneske kan ikkje tole 50 piskeslag. Raifs kropp og psyke vil ikkje tole dette, seier ho og ristar på hovudet.

– Det er rein tortur.

• Les: Amnestys generalsekretær i Norge:– Jeg vil møte opp ved ambassaden hver fredag til piskingen slutter

Håp om at protestane vil nytte

På oppfordring frå Amnesty International har folk verda rundt protestert utanfor Saudi-Arabia sine ambassadør kvar fredag, som er den dagen Raif normalt skal ta imot dei 50 vekelege piskeslaga.

Haidar håpar at verdssamfunnet sine protestar har hjelpt.

– Så langt er ingenting klårt. Men det har hjelpt meg. Eg kjenner at verda står saman med oss. Det same gjer Raif. Eg vil takke kvar og ein som står framfor desse ambassadane kvar veke. Når det gjeld neste skritt har eg ikkje noko svar. Eg håpar at folk vil halde fram å kjempe for at Raif skal verte løyslaten.

Kongeleg kritikk

Då Kong Abdullah døydde i januar deltok kronprins Haakon under minneseremonien i Saudi-Arabia. Han fekk kritikk for deltakinga.

Mange meinte kronprins Haakon heller burde nytte høvet til å tale Badawi si sak, slik Storbritannias prins Charles gjorde.

• Les: Kronprinsen får kritikk for å delta i Kong Abdullahs begravelse
• Les: – De kongelige er nyttige maskoter

– Når det er ein samtale mellom regjeringar hjelp det sjølvsagt. Eg håpar dei ber den saudiarabiske regjeringa om å lauslate Raif, seier Haidar.