Japan har, saman med Jordan, prøvd å forhandle fram ein avtale med IS. For i tillegg til Kenji Goto, har også den jordanske flygaren Muath al-Kasaesbeh vore fanga av IS.
Islamistgruppa har truga med å drepe dei to gislane om ikkje Jordan slepp fri terrordømde Sajida al-Rishawi. Rishawi vart dømd til døden i Jordan i 2006, etter at ho vart arrestert med eit bombebelte under ein terroraksjon i Jordans hovudstad, Amman.
No melder SITE, ei teneste som overvaker ekstremistiske nettsider, at IS hevdar å ha drepe Goto.
Trugslar mot Japan
Både japanske og amerikanske styresmakter seier at dei no jobbar med å verifisere ein video som er lagt ut på nettet, og som skal vise avrettinga av Goto.
Japanske styresmakter går i kveld ut og fordømmer nyheita om at Goto er avretta, og landets øvste leiing er kalla inn til hastemøte.
Bøddelen i videoen skal ha gitt ein beskjed til japanske styresmakter. Han seier Japan er med i ein satanistisk allianse, og at marerittet er i ferd med å begynne for Japan.
Det skal ikkje ha blitt gitt noko meir informasjon om den jordanske gisselen i videoen.
Har forhandla
Tidlegare i dag sa Yasuhide Nakayama, ein representant for japanske styresmakter, at forhandlingane gjekk trått.
– Forhandlingane har låst seg, men me følger nøye med og analyserer og vurderer i fellesskap den informasjonen me har, sa Nakayama.
Opphavleg skal IS hakravdd 200 millionar dollar for å sette Goto fri, men kravet vart etter kvart endra til å få sett Rishawi fri.
IS har gitt Japan og Jordan stadig nye fristar til å finne ei løysing dei siste dagane, utan at det så langt har gitt noko løysing.
Også førre laurdag sa IS at dei hadde drepe eit anna japansk gissel.