Tidlegare forsvarsminister seier USA er utan ansvarleg leiarskap

– Donald Trump er den første presidenten i levetida mi som ikkje gjer noko for å sameine det amerikanske folket – han lèt ikkje ein gong som han prøver. I staden prøver han å splitte oss, seier Mattis til avisa The Atlantic.

Den tidlegare forsvarsministeren oppmodar det amerikanske folket til å «avvise og halde ansvarleg dei ansvarlege som gjer narr av grunnlova».

– Vi er vitne til konsekvensane av tre år utan ansvarleg leiarskap, seier Mattis.

Trakk seg etter Syria-strid

Mattis vart Trumps første og USAs 26. forsvarsminister 20. januar 2017. Han sat i eitt år og elleve månader.

Han var usamd med presidenten i fleire sentrale utanrikspolitiske saker, og trekte seg etter at Trump, mot Mattis sin vilje, kunngjorde ei amerikansk tilbaketrekking frå Syria.

• Eksperter om Mattis-avgang: – Nå forsvinner sikkerhetsnettet

Trump svarte på Twitter

Det gjekk ikkje lang tid før Trump slo tilbake mot kritikken. På Twitter kalla han Mattis for «verdas mest overvurderte general».

– Eg gav han eit nytt liv, nye ting å gjere og nye slag å vinne, men han oppnådde sjeldan suksess. Eg likte ikkje «leiarstilen hans» eller mykje anna ved han, og mange er samde. Glad han er borte! rasa Trump.

Carter kritisk

Tidlegare president Jimmy Carter går no ut mot president Donald Trump.

Carter, som er USAs eldste attlevande president, seier i ei fråsegn at det gjer vondt å sjå den «tragiske urettvisa og reaksjonen i landet dei siste vekene». Han seier at vald uansett ikkje er løysinga, og at ansvaret ligg hos den sittande leiinga.

– Vi treng ei regjering som er så god som folket sitt, og vi er betre enn dette, seier Carter.