Mini: – Han fortener all heideren han får

– Han er ein heidersmann på fotballbanen og ein heidersmann utanfor fotballbanen også, meiner Jahn Ivar «Mini» Jakobsen.

Den tidlegare Rosenborg-angriparen er i dag fotballekspert i TV 2, men hugsar stadig kampane mot rivalen i Romsdal.

– Eg hugsar sjølvsagt alle kampane eg har spelt i Molde, for eg har aldri tapt i Molde. Då hugsa eg at Daniel gjekk slukøyra av banen. Men så hadde vi nokre semifinalar på Lerkendal, der han og Kjetil Rekdal spelte ... Det er litt vonde minne, fortel Mini.

Han hugsar Daniel Berg Hestad som ein mann som alltid har stått på og jobba, vunne duellar og samstundes haldt seg unna «faenskap utanfor bana».

– Når du får så mykje som 440 kampar, og har i tillegg har det for éin klubb, så fortener du alle klappa på skuldra og all heideren du får, meiner den tidlegare RBK-spelaren.

– I kveld bøyer vi oss i støvet for han. Om dei ikkje tok bussen tilbake til Molde så skulle eg spandert ei Cola Zero på han på byen, flirer Mini.

• Les også: Berg Hestad: – Eg tenkte rekorden var uoppnåeleg

– Stolt augneblink

Han har spelt i Molde sidan 1993, og utanom to år frå 2003 til 2005 i nederlandske Heerenveen, har Berg Hestad vore ein konstant i den blå trøya.

I 1-0-sigeren over Aalesund på Color Line Stadion tok han altså rekorden som Roar Strand har hatt. No har han 440 kampar i eliteserien, mest noko sinne.

– Det er fantastisk. For det første var det ein god siger, men eg smakte litt på den etterpå. Då eg fekk plakat og litt forskjellig. Ein stolt augneblink, litt brydd og litt rørt. Det er artig, oppsummerte Berg Hestad etter kampen.

Han synest det er rart å tenkje på alle kampane han har spelt.

– 440, det er utruleg mykje når du tenkjer på det. Det blir maks 30 kampar i året, så då kan ein rekne sjølv. Eg har heldt det gåande lenge, men eg er framleis svolten og har motivasjon og inspirasjon, slår han fast til NRK.

Saka held fram under bildet.

Har tenkt på 2015

Kontrakten til midtbanespelaren går ut etter sesongen. Allereie no er 2015 i tankane.

– Eg må tenkje på kva eg skal finne på, men det er ikkje berre opp til meg kva eg skal gjere. Eg håper og trur uansett eg kan vere involvert i Molde i ei eller anna form, seier Berg Hestad.

– Med fotballsko på føtene?

– Det er ikkje umogleg, det er ikkje umogleg, avsluttar han glisande.

Mini Jakobsen, som la opp i 1999 som 33-åring, meiner han sjølv kunne spelt som 39- og 40-åring.

– Ja, men ikkje på det nivået som Daniel har gjort det. Han blir 39 år no, og det å halde seg så fit. Det viser litt korleis fotballen har endra seg. Dei er meir merksame på kroppen sin, noko som gjer at han framleis kan halde på.

– Kor lenge trur du han kan halde det gåande?

– Det kjem an på kor mange gode spelarar som kjem no. Kven vil prøve å skyve han ut? Hadde eg vore ung midtbanespelar i Molde-regionen, så hadde eg forbanna meg på at eg svarte ikkje skal sitje på benken for ein 39- eller 40-åring. Så det er opp til ungdomen å ta opp hansken og skyve han ut!, avsluttar Mini.