– Du vil jo helst ut å trene i staden for å sitje her inne å høyre på det faglege. Det er ikkje akkurat det som er det kjekkaste, seier Espen Johnsen.
- Les også: Grubben junior vil bli verdensmester
Trippar utålmodig
Dei to sit i klasserommet med klassekameratane og høyrer på lærar Thomas Åbø. Det er treningslære som står på timeplanen. Læraren snakkar om arbeidsøkonomi og kontinuitet. To stikkord som er viktige for å nå verdstoppen.
– Vi må ha kontinuitet. Kontinuitet i ei økt. Kontinuitet i ei veke. Kontinuitet i ein månad, seier læraren.
Fleire elevar sit utålmodig og trippar etter å komme seg ut i skisporet der dei aller helst vil vere.
– Om du ser beina går litt og du ser at dei er ivrige er det eigentleg berre positivt. Dei vil ut å trene og setje det dei lærer i teorien ut i praksis, seier Åbø.
Siktar mot Linda Grubben
Den mest kjende eleven som har gått på skulen til no er Linda Grubben. I 2007 vart ho verdsmeister på normaldistansen under VM i Antholz.
I nyare tid er det Lars Helge Birkeland frå Birkenes og Marte Olsbu frå Froland som har presert best. Begge var med til VM i Kontiolahti tidlegare i vinter.
– Målet vårt er å gje elevane både utviklinga dei ynskjer i skiskyting, men samstundes få studiekompetanse når dei har gått her i tre år, seier rektor Johan Vesteraas.
Vil bli best i verda
Det krev knallhardt arbeid over fleire år for å bli like god som Linda Grubben, Ole Einar Bjørndalen og dei andre verdsstjernene. Men pågangsmotet og motivasjonen er det ingenting å seie på.
– Målet mitt er at eg trenar kvar dag, gjer så godt eg kan heile tida. Så får vi sjå kor mykje kroppen min toler, seier Espen Johnsen.
– Målet mitt er å bli best i verda. Eg må jobbe hardt, så kjem det til slutt berre du vil nok, seier Margitt Sørensen.