Foreldre har politimeldt lærar, rektor og kommune for mobbing

Det skriv Fjordenes Tidende på sine nettsider.

– Vi har teke i mot ei politimelding frå ein familie som har hatt eit barn på skulen som skal ha vorte mobba gjennom fleire år. Det er kommunen, rektor og ein lærar som er politimelde, seier regionlensmann i Nordfjord, Tormod Hvattum, til NRK.no.

Han ønskjer ikkje å gå nærare i detaljar om saka.

– Vi tok i mot politimeldinga litt tidlegare denne veka, seier Hvattum.

• LES OGSÅ: Gut vart halden under vatn til han mista pusten - no har kommunen fått 100.000 i bot
• LES OGSÅ: Vedtar mobbebot på 100 000 kroner

Har ikkje gjennomført avhøyr

Han stadfestar at politiet har byrja å jobbe med saka.

– Vi har ikkje gjort noko avhøyr endå. Det er eit omfattande materiale vi må setje oss inn i, før vi startar med avhøyrsprosessen, seier Hvattum.

– Kor alvorleg ser du på denne saka?

– Det er det for tidleg å seie noko om før vi har fått med oss alle detaljane, seier Hvattum.

Lensmannen ønskjer ikkje å seie noko om kva skule det er snakk om eller kva kommune skulen ligg i.

• LES OGSÅ: Høyanger kommune bryt lova - gjer ikkje nok mot mobbing
• LES OGSÅ: Meiner skulane gjer ein altfor dårleg jobb i arbeidet mot mobbing