I Nordfjord står ei grå fjordhesthoppe, og anar lite om at ho kan bli ein verdskjent attraksjon.
– Denne blir ein grei attraksjon, konkluderer Asle Espe ved Norsk Fjordhestsenter i det han stolt viser fram den firbeinte som ber namnet Sølvi.
Ho har rosa grime på seg. Litt Hollywood-glamour sømer seg i kvardagen, no som Disney for første gong lanserer eigne cruisereiser – der Sølvi blir ein av attraksjonane.
Milliard-suksess
Tungt marknadsført med video på nettstaden Youtube spinn Disney-konsernet vidare på ein av deira største filmsuksessar.
- Her kan du sjå Disney sin reklamefilm med bilete frå Vestlandet (ekstern)
- Les også:
- Les også:
Animasjonsfilmen «Frost», eller «Frozen», er på femteplass over tidenes mest lønsame filmar. Filmen har spelt inn 1,3 milliardar dollar. Den er inspirert av norsk natur, og har ein vaskeekte fjordhest i ei av rollene. Til sommaren kjem Disney sin eigen cruisebåt til mellom anna Olden i Nordfjord.
Frå før har reiseliv over heile landet rapportert om auka etterspurnad frå utlandet som følgje av animasjonsfilmen frå 2013.
(Artikkelen held fram under biletet.)
Lokkar med nyfødde føl til sommaren
– Det var vel denne det var bilete av på nettsida til Disney. Det er ei vi har dulla litt med, fortel Espe.
Fjordhesten og Disney er ei lita brikke i eit stort reiselivsapparat på Vestlandet som ventar i spenning på effekten av filmen.
Ingen veit sikkert før cruiseskipet «Disney Magic» kjem til sommaren, om kor mange som faktisk går i land, og kva dei vil sjå.
Asle Espe er i alle fall spent på om fjordhestsenteret blir litt Disneyland til sommaren, då passar det godt at hoppa Sølvi ventar føl.
– Det kan hende det blir ein viktig for å stå på framover, seier den daglege leiaren ved Norsk Fjordhestsenter.