Bilindustrien løftar smelteverka

Aluminiumsindustrien i Sogn merkar at bilindustrien er inne i eit grønt skifte. Strenge vekt og utsleppskrav gjer at aluminium laga av fornybar energi er blitt ei svært etterspurt merkevare.

Verkssjef ved Hydro i Årdal Egil Fredriksen seier marknaden for alumiumskarosseri til bilar veks så raskt at det nesten er eit problem å få laga nok

– Markanden veks enormt raskt, etterspurnaden er nærmast umetteleg. Det er vidareforedlingskapasiteten nede i Europa som avgrensar kor mykje vi kan levere der.

Fordel med grøn kraft

Fredriksen seier bilprodusentane etterspør råvarer som er produsert med minst mogleg utslepp av Co2.

– Det å ha rein aluminium er ein kjempefordel i marknaden, strenge kvalitetskrav er også ein fordel for oss.

Bilindustrien sikrar marginane

Og det som er viktig for Hydro er også viktig for Årdal og Høyanger. Til saman 710 menneske står på lønslista til Hydro i dei to bygdene, 550 av desse i Årdal.

For tida er prisane på aluminium svært låge på verdsmarknaden, men gunstig kronekurs og voldsom etterspurnad frå europeisk bilindustri er med å sikre marginane, forklarar verkssjef i Høyanger Wenche Eldegard.

– Vi får meir betalt frå bilindustrien, slik at marginane på produkta vert høgare til neste år.

Kvifor er aluminiumsprisane så låge?

– Det er større produksjon enn etterspurnad. Mykje av usikkerheita i marknaden skuldast at Kina no leverer til marknaden i Europa og pressar prisane nedover.

• LES OGSÅ: Hydro satsar mot billindustrien
• LES OGSÅ: Biljuks passar Hydro midt i blinken

Blir færre tilsette

Men trass spennande tider, og nye produksjonsrekordar har begge verka effektiviseringskrav over seg i året som kjem.

Hydro i Årdal skal åleine effektivisere for 20 millionar kroner, i tillegg er arbeidsstokken aldrande. Dei neste tre åra skal seksti tilsette gå av med pensjon i Årdal, men ungdomen bankar på døra. Nedturen i olje og gass har gjort landindustrien meir attraktiv. Hydro i Årdal har no heile 50 lærlingar.

– Vi har god rekruttering. Vi er truleg den største lærlingverksemda i Sogn og Fjordane.

Men sjølv om verka trur dei vil unngå oppseiingar i 2016, blir det færre på lønslista til Hydro her i fylket.

– Du kjem ikkje unna det. Noreg er eit høgkostland og bemanninga vil stadig gå nedover. På 80-talet var det 2000 tilsette på Årdal verk, i dag er vi 550 og produserer likevel meir i dag. Det er ganske sikkert at det blir førre tilsette i 2016, seier Fredriksen.