Hydro-sjef Hilde Merete Aasheim går av, skriv selskapet i ei pressemelding.
Aasheim går av etter fem år som konsernsjef. Ho har jobba i selskapet i 17 år.
– I perioden hennar har Hydro styrka lønnsemda og løfta arbeidet med berekraft betydeleg, seier styreleiar Dag Mejdell i børsmeldinga.
Eivind Kallevik er utnemnd til ny sjef for Hydro. Han er i dag konserndirektør og leiar for Hydro sitt forretningsområde Aluminium Metal.
Eivind Kallevik er utnemnd til ny sjef for Hydro.
Foto: Ole Berg-Rusten / NTB– Eg gler meg til å ta fatt på neste steg for Hydro saman med våre 32 000 dyktige og engasjerte medarbeidarar, seier Kallevik. Han tek over for Aasheim 13. mai.
Aasheim har planlagt avgangen sidan i fjor haust, opplyser informasjonsdirektør Halvor Molland i Hydro til E24. Ho forlèt selskapet ved utgangen av juni.
Viktig samarbeidspartnar
Konsernsjef i Yara, Svein Tore Holsether, seier til NRK at Aasheim har vore ein sterk leiar for Hydro og ein viktig samarbeidspartnar for Yara. Holsether har kjent Hydro-sjefen i mange år, sidan han var fersk i bransjen.
– Ho er dyktig, engasjert, «hands on», set sikkerheit først.
Holsether meiner Aasheim har spela ei viktig rolle i norsk industri gjennom mange år.
– Hildes tydelege stemme innanfor avkarbonisering av industrien og bransjens enorme behov for utbygging av fornybar kraft har vore viktig i ei tid der industrien står overfor store omveltingar.
Sjef for Equinor, Anders Opedal vil takke Hilde Merete Aasheim for godt samarbeid. Det skriv han i ein e-post til NRK.
Opedal seier Aasheim har vore ei viktig kraft i dei norske industriselskapa sitt arbeid med å sikra ei framtidsretta energi- og industripolitikk.
