Skal hjelpa elevar med dårleg sjølvbilete

– Mange slit med presset om å sjå bra ut, og for mange kjem det på toppen av andre problem, seier avdelingsleiar ved Møllehagen skulesenter i Stavanger, Jone Johnsen.

Han er tilsett ved ein av to norske deltakarskular i det internasjonale prosjektet MIRROR MIRROR skal gjera liv og kvardag lettare for barn og unge som slit med dårleg sjølvbilete, og hjelpa desse med å fullføra skulegang.

• LES OGSÅ: 70 prosent er misfornøgde med utsjånad
• LES OGSÅ: 60 prosent av tenåringsjentene slit med dårleg sjølvbilete

Store konsekvensar

Lærarane skal læra korleis dei kan sjå elevar som slit med egen utsjånad, og hjelpa desse til å ha det betre.

– Dårleg sjølvbiletet påverkar veldig mykje; kommunikasjon med andre, prestasjonar på skulen og moglegheiter i arbeidsmarknaden. Difor er det så viktig å gjera lærarane bevisste på desse problema, understrekar Johnsen.

Eit europeisk samarbeid

EU-kommisjonen står bak satsinga som skular i Portugal, Austerrike, England og Danmark er med på saman med Møllehagen skulesenter og Rogaland skole- og bedriftsutvikling frå Noreg.

– Omfattande statistikk rundt sjølvbilete, psykiske vanskar og fråfall i skule og arbeidsliv blant unge ligg til grunn for satstinga, seier prosjektleiar Olga Fagerland.

I oktober skal deltakarlanda gå gjennom funn og erfaringar.

• LES OGSÅ: Meiner psykisk helse bør inn som eige skolefag

Dette er tiltaka

Ifølgje prosjektet kan lærarar fremme eit ope læringsmiljø slik:

• Få betre forståing av kva for verdiar, haldningar og normer ulike kulturer og etnisiteter har rundt utsjånad.
• Auke bevisstheita blant kollegaer om stereotypiar og skaping av inntrykk blant sine elevar.
• Auke forståinga av moglege utfall av misnøye over utsjånad.
• Oppmuntra til passande utseendesamanlikningar.

Håper satsinga veks

Til hausten er Møllehagen skule ferdig med opplæringa av eigne lærarar. Då skal skulen tilby kursing og opplæring av andre skular som er interesserte i MIRROR MIRROR.

– Tilbakemeldingane frå lærarane våre har vore kjempepositive. Me såg mykje engasjement, og alle meiner at det er eit svært aktuelt problem, som det er viktig å ta tak i. Eg håper fleire blir med på dette, seier prosjektleiar Olga Fagerland.

• LES OGSÅ: Folk med psykiske helseplager fell ut av arbeidslivet
• LES OGSÅ: Sosiale medier kan gi deg eit sjukt kroppsbilde