Svært få vil inn i dette faget

Dei siste åra har det vore låg rekruttering, få har tatt fagbrev og talet på lærlingar har vore lik null.

Ole Kristian Flaaen, dagleg leiar i fiskeridivisjonen til bedrifta Mørenot, fortel at dei er heilt avhengige av fleire ungdom i fiskereiskapsfaget.

– Det er svært viktig for å halde på kompetansen i bedriftene langs kysten.

– I tillegg er det viktig å føre over erfaring til unge kandidatar, slik at vi held kompetansen lokalt og nasjonalt, meiner Flaaen.

– Slit de med rekrutteringa?

– Utfordrande

– Vi får tak i folk til jobbane, men det er utfordrande å få tak i unge, nye kandidatar som vil lære seg faget frå grunnen av, seier Mørenot-leiaren.

Ved Fiskerifagleg Opplæringskontor i Møre og Romsdal, fortel leiar Odd Lennart Blindheim at trenden er uroande.

Han er oppteken av at gamle tradisjonar skal bli haldne i hevd.

– Formell kompetanse blir viktigare, uansett kvar yrke du har. I denne typen bedrifter finst det mykje kompetanse som er i ferd med å bli godt vaksen.

– Vi treng ungdommar som ønskjer å satse på dette. No har vi akkurat fått inn vår første lærling i Mørenot, som skal vere der i to år, fortel Blindheim.

Saka held fram under bildet.

Første på 10–15 år

Den lærlingen er 18 år gamle Åge-André Bjørvik, og han elskar jobben.

– Planen min har alltid vore å jobbe på sjøen, men det var ikkje godt for meg. Eg har litt smådårleg rygg, og eg likar å ha føtene planta på jorda, fortel Bjørvik.

– Så eg prata med læraren min, og han spurte om eg ikkje ville prøve nokon med fiskereiskap. Og no har eg eigentleg forelska meg litt i bedrifta.

Han bøter garn då NRK pratar med han på nótbøteriet til Mørenot i Spjelkavik i Ålesund.

– Har du tenkt noko på at det er mangle på ungdom som vil bli fagarbeidarar i fiskereiskapsfaget?

– Eg blei litt sjokkert då dei sa at eg var den første på 10–15 år som verkeleg har tenkt å jobbe med dette. Det er eit veldig greitt yrke.

– Ikkje vore noko utan utstyret

18-åringen meiner faget er viktig for Noreg.

– Fiskeri er éi av dei største inntektene som Noreg har. Utan folk som kan lage utstyret så hadde det ikkje vore noko, meiner Bjørvik.

Frå utsida seier han at jobben kan sjå kjedeleg ut.

– Men det er svært interessant. Eg gler meg til å lære meir, og eg håper at fleire ungdomar vil prøve dette yrket, avsluttar lærlingen i Mørenot.