Bjørnejegerane er no i aksjon

For nokre veker sidan gjekk ein bjørn fullstendig berserk på sauene i Isfjorden i Rauma. I kveld starta bjørnejakta.

• LES OGSÅ: Fellingslag skal jakte bjørn for første gong: – Vi står på bar bakke
• LES OGSÅ: Finn ikkje bjørnen og gir opp jakta

I førre veke gav derimot både fellingslaget i Rauma og fellingslaget på Nesset opp jakta, i den tru på at bjørnen hadde forsvunne.

For ingen hadde sett nye teikn til bjørnen, etter dei tosifra sauekadavera som blei funne.

No har derimot to fjellgåarar observert bjørnen igjen, melder Åndalsnes Avis.

– Det er uklårt om bjørnen har vore i området heile tida, eller om den har kome tilbake no, seier rovviltkontakt Rune Horvli.

Saka held fram under bildet.

Skal ha jaga ein saueflokk i dag

For tidlegare i dag kom det meldingar om at bjørnen skal ha jaga ein saueflokk i området Lillehesten – Storehesten. Det skal vere nær skianlegget i Isfjorden.

Bjørnen var like bak saueflokken, og ifølgje vitneobservasjonen som blei gjort på berre 100 meters avstand.

Fellingsløyvet på bjørnen er eigentleg utgått, men Horvli fortel at Fylkesmannen skal ha gjeve nytt løyve muntleg på telefon.

– Vi ber publikum om å halde seg på avstand. Vi kan ikkje nekte nokon å ferdast i området, men vi har ei moglegheit til å få tak i bjørnen no.

– Derfor oppfordrar vi til så lite trafikk som mogleg i området, seier Horvli til Åndalsnes Avis.

Jaktlaget i Rauma fortel at dei blei varsla like over klokka 14.00, og at bjørnejakta no er i gong igjen.

Rovviltkontakt Horvli fortel at spesialtrent hund og hundeførar er på veg frå Selbu til Rauma. Dei vil vere i Isfjorden tidlegast klokka 19.00.