No er «superdepartementet» fødd

Den borgarlege regjeringa har store ambisjonar med det heilt ferske departementet, Kommunal- og moderniseringsdepartementet (KMD).

Med statsråd Jan Tore Sanner (H) i spissen, skal KMD i 2014 ta fatt på to krevjande oppgåver: å sørgja for at Noreg får færre og større kommunar og å forenkla, forbetra og fornya offentleg sektor.

– Offentleg tilsettte skal bruka mindre tid på rapportering og å fly i møte, og meir tid på å løysa oppgåver. Det vil føra til at folk får raskare og betre hjelp, seier kommunal- og moderniseringsministeren.

Betre og raskare Nav

KMD er ei samanslåing av det tidlegare Fornyings- og administrasjonsdepartementet (FAD) og Kommunal- og regionaldepartementet (KRD).

Sanner nemner Nav, sjukehus, skule, barnehagar, bustadbygging og etablering av næringseigedom som døme på område der folk skal oppleva betre og meir effektiv sakshandsaming som følgje av samanslåinga.

Også den varsla kommunereforma skal gje innbyggjarane betre tenester.

– Kommunereforma dreier seg om å skapa meir lokaldemokrati, å flytta fleire oppgåver til kommunane. Då treng me større og meir robuste kommunar, meiner Sanner.

Kommunaldepartementet var frå før av eitt av dei tyngste og mest krevjande departementa.

Store forventningar og mange tunge ansvarsområde er bakgrunnen for at media har gitt KMD kallenamnet «superdepartementet».

– Det blir i alle fall eit departement som har superviktige oppgåver. Me får ei unik moglegheit til å sjå samanhengane mellom stat og kommune, mellom plan- og bygningslov. Det meiner me vil føra til større gjennomføringskraft og betre løysingar, seier Sanner.

– Superviktige oppgåver

I tillegg til å samordna regjeringa si moderniseringspolitikk, har KMD også ansvaret for mange og svært ulike politiske område, som blant anna IKT, statleg arbeidsgjevarpolitikk, bustads-, distrikts-, og same- og minoritetspolitikk.

Kva utfordringar kan det by på å ha så vide ansvarsområde?

– Eg meiner det først og framst gir nye moglegheiter. Kritikken som blant anna blei reist av Gjørv-kommisjonen var retta mot for sterk sektortenking og for dårleg samordning i staten. Med eit større departement får me betre moglegheiter til å sjå samanhengane i politikken, ifølgje Sanner.

Tidlegare fornyings- og administrasjonsminister Rigmor Aasrud (Ap), trur det vil bli ei krevjande oppgåve for Sanner å samordna to så store departement.

– Det kjem til å krevja formidabel innsats å samordna alt frå personvern, it-politikk, samepolitikk og så vidare. Det blir eit stort spenn i dette nye departementet, men det er opp til den borgarlege regjeringa korleis dei vil organisera arbeidet sitt, seier Aasrud.

Aasrud vil poengtera at også den raudgrøne regjeringa hadde eit stort forenklingsarbeid på gang.

– Det er viktig og bra at den nye regjeringa tek grep for å følgja dette opp. Eg vil berre ønskja Sanner lukke til, seier Ap-politikaren.

• LES OGSÅ: Solberg legger ned Fiskeridepartementet