Bøtesatsane blir fastsett i dei ulike politidistrikta. Berre i Møre og Romsdal er forskjellane i pris merkbare. Nordmøre og Romsdal ligg jamt over høgare enn politidistriktet sør i fylket (sjå oversikt nedst i artikkelen).
Mellom anna er det om lag dobbelt så dyrt å drikke på gata i Molde eller Kristiansund, enn om du gjer det same i Ålesund. Medan du må ut med minst 3000 kroner på Sunnmøre, startar satsane lenger nord i fylket på 6000 kroner.
Meiner folk skal merke reaksjonen
Og slik er det over heile landet. Ei rundspørjing NRK har gjort til ei rekkje politidistrikt viser forskjellar på fleire felt.
Medan du i Asker og Bærum må ut med 2500 kroner for å tisse på gata, startar prisen på 4000 i Follo – eller minst 6000 kroner om det er helg. Men vel du å late vatnet slik at du grisar til hus eller anna, auka prisen raskt, også i Asker og Bærum, der satsen då startar på 4000 kroner. I Tønsberg startar bøtene på 4000 kroner, men ved tilgrising blir det fort meir.
– Vi ønskjer jo at det skal vere folk i byane og at dei skal hygge seg, særleg no i julebordsesongen, og då må vi reagere når nokon øydelegg, seier politiinspektør Ove Brudevoll ved Nordmøre og Romsdal politidistrikt.
No i førjulstida er det fleire enn vanleg som er ute på byen og risikerer å bli bøtelagde om dei ikkje held seg i skinnet. Brudevoll seier folk skal merke reaksjonen dersom dei oppfører seg dårleg.
– Vi ser jo at det er ein del folk i byen som vanlegvis ikkje er ute og at det gjerne blir ein del alkohol, og det er gjerne då slike ting oppstår.
– Kva tenkjer du om at satsane er så ulike for Nordmøre og Romsdal og til dømes Sunnmøre?
– Eg tenkjer at vi har fornuftige satsar, ut over det har eg ikkje noko meining om det, seier Brudevoll.
Skjønn avgjer storleiken
Sjølv om satsane er ulike, kan det fort bli dyrt uansett. Politiet understrekar at det er den konkrete hendinga som avgjer kor stor bota faktisk blir, og grove overtramp skal koste dyrt.
Eli Anne Tvergrov i Sunnmøre politidistrikt er lite opptatt av at satsane er ulike. Hennar distrikt har låg startsats på fleire av bøtene samanlikna med andre delar landet. Ho meiner likevel folk må vere klar over at bota kan bli høg, uansett kvar du er.
– Bøtene blir avgjort ut frå skjønn i kvar enkelt sak. Til dømes vil bøtesatsen for å nekte å betale drosjerekninga starte frå 3000 kroner, men i grove tilfelle kan bota fort ende på 5000 kroner og meir, seier ho.
Og nektar du å vedta bota frå politiet, blir summen oftast langt høgare.
– Det er oftast langt dyrare å få saka behandla i retten, seier Tvergrov.
Kan tilpasse satsane lokale utfordringar
Vil du ikkje fortelje politiet kven du er, er det billigast i Ålesund. På Sunnmøre startar bøtene på 3000 kroner, medan bota i Trondheim blir meir enn dobbelt så dyr. Der startar prisen på 7000.
Og skulle du falle for freistinga å stikke av frå drosjerekninga, bør du ikkje gjere det på Sørlandet. I Kristiansand kostar dette deg 5000 kroner – i tillegg til den opphavlege rekninga. Dei fleste stader startar prisen på 3000 kroner.
Det kan altså skilje fleire tusen kroner frå distrikt til distrikt.
Når satsane varierer kan det skuldast at politiet kan tilpasse dette til lokale forhold. Det seier politiinspektør Inge Lise Øverby i Søndre Buskerud politidistrikt.
– Dersom eit distrikt har særlege utfordringar, til dømes innanfor ordensforstyrring, kan det vere at dei ønskjer å auke satsane på dette område, seier ho.
I Vestfold har dei mellom anna valt å ha høgare bøter for ordensforstyrring og for å ikkje rette seg etter pålegg frå politiet når dette skjer i bysentrum. Andre stader, til dømes på Lillehammer og Lillestrøm, har dei høgare bøter i helgane. Nokre stader er satsane høgare om sommaren, når turistane inntar bybiletet.