I dag klokka 12.00 var det songen «Barn av regnbuen» som blei symbolet på det norske samfunnet, med fred, fridom og samhald. Anders Behring Breivik, som sit på tiltalebenken i Oslo tingrett, sa i retten at denne songen var med på å hjernevaske det norske folk. I dag ljoma songen som ein reaksjon mot terroren 22. juli.
På Youngstorget i Oslo song 40.000 menneske songen, med Lillebjørn Nilsen som forsongar. Også i ei rekkje norske byar og tettstader var det arrangement der folk møttest for å synge.
– Syng der du er
I Ulstein i Møre og Romsdal gjekk soknepresten og organisten ut med ei oppmoding om å synge der kvar einskild var klokka 12. Sjølve var dei på Alvehaugen sjukeheim, og song saman med dei som bur på sjukeheimen.
– Då eg høyrde om initiativet i Oslo tenke eg at eg ville vere akkurat der. Men det kunne eg ikkje. Då tenkte eg i staden at kvar og ein kunne synge akkurat der dei uansett var klokka 12.00. Difor gjekk vi ut med denne oppmodinga, seier sokneprest Margit Lovise Holte.
– Det var rørande
I utgangspunktet var det andakt på sjukeheimen denne torsdag formiddagen. Og reaksjonane mot terroren vart tema i andakta. Nøyaktig klokka 12 vart bebuarane på Alvehaugen sjukeheim med i det store koret.
– Dei som bur på Alvehaugen har jo levd ei stund. Og det var veldig rørande å vere der og synge akkurat denne songen saman med dei i dag. I andakta prata eg litt om det som skjedde på Youngstorget og kvifor vi valde å synge akkurat denne songen akkurat på det tidspunktet, fortel Holte.
Nestekjærleik
Andakta på sjukeheimen handla eigentleg om nestekjærleik. Dermed var det lett å rette fokus mot rosetog, samhald og initiativet til å synge «Barn av regnbuen».
– Det var meiningsfylt. Dei song med. Og vi fekk oppleve at songen har veldig kraft her på Sunnmøre. Dette handlar om samhald, seier sokneprest Margit Lovise Holte.
